حافظ آباد (نمائندہ نوائے وقت )وزیر اعلیٰ پنجاب مریم نوازکی جانب سے پہلی بار صوبہ بھر کے گورنمنٹ اسپیشل ایجو کیشن سکولوں میں پڑھنے والے خصوصی بچوں کو عید گفٹ تقسیم کیے گئے ۔ڈپٹی کمشنر حافظ آباد عبدالرزاق نے گورنمنٹ اسپیشل ایجو کیشن سکول کے خصوصی بچوں میں وزیرا علیٰ کی جانب سے عید گفٹ تقسیم کیے ۔عید گفٹ ملنے پر بچوں نے دلی خوشی کا اظہار اور وزیرا علیٰ کا شکریہ ادا کیا۔ پرنسپل میڈم راحیلہ بھی اس موقع پر انکے ساتھ تھی ۔ڈپٹی کمشنر عبدالرزاق کاکہنا تھا کہ وزیرا علیٰ پنجاب مریم نواز کی جانب سے پہلی بار صوبہ بھر کے تمام گورنمنٹ اسپیشل ایجو کیشن سکولوں میں پڑھنے والے طلباء و طالبات کو اپنے ساتھ عید کی خوشیوں میں شامل کرنے کے لیے خصوصی عید گفٹ تقسیم کیے گئے ہیںاور یہ پہلا موقع پر ہے حکومت پنجاب کی جانب سے ان خصوصی بچوں کو بھی عید کے خوشی کے لمحات میں یاد رکھتے ہوئے انہیں خصوصی گفٹ دیئے گئے ہیں۔ڈپٹی کمشنر کاکہنا تھا کہ حافظ آبااور پنڈی بھٹیاں کے گورنمنٹ اسپیشل ایجو کیشن سکول اور گورنمنٹ سلولرنرسکولوں میں مجموعی طور پر 530سے زائد طلباء و طالبات میں یہ عید گفٹ تقسیم کیے گئے ہیں۔