امریکا میں واشنگٹن ائیرپورٹ کے قریب مسافر طیارہ اور فوجی ہیلی کاپٹر آپس میں ٹکرا گئے، حادثے میں ہلاک ہونے والے 18 افراد کی لاشیں نکال لی گئیں جبکہ حکام نے مزید ہلاکتوں کا خدشہ ظاہر کیا ہے۔ فوجی ہیلی کاپٹر سے ٹکرانے کے بعد مسافر طیارہ پوٹومیک دریا میں گرگیا، حادثے کے بعد دریائے پوٹومیک میں غوطہ خور تعینات کردیے گئے۔ امریکی میڈیا کے مطابق امریکی ایئر لائن کی پرواز کینساس کے شہر وکیٹا سے واشنگٹن پہنچی تھی جہاں طیارے کو دریائے پوٹومیک کے اوپر رن وے کے قریب حادثہ پیش آیا۔ فلائٹ ریڈار کے مطابق حادثہ شام 5 بج کر 48 منٹ پر پیش آیا، جب طیارے کی رفتار 166 کلو میٹر فی گھنٹہ تھی۔ ابتدائی اطلاعات کے مطابق طیارے میں 64 افراد کے بیٹھنے کی گنجائش ہے جو فوجی ہیلی کاپٹر سے ٹکرانے کے بعد پوٹومیک دریا میں گرگیا۔ امریکی حکام کا کہنا ہے کہ طیارے میں 60 مسافر جبکہ 4 عملے کے افراد سوار تھے، حادثے کی اطلاع ملتے ہی امدادی کارروائیاں شروع کردی گئیں اور ریسکیو ٹیمیں جائے وقوع پر پہنچ گئیں۔ طیارے سے ٹکرانے والے فوجی ہیلی کاپٹر میں 3 اہلکار سوار تھے، حادثے کے بعد ریگن نیشنل ایئر پورٹ پر تمام پروازیں معطل کر دی گئی ہیں جب کہ صدر ڈونلڈ ٹرمپ کو بھی فضائی حادثے سے آگاہ کردیا گیا ہے۔ امریکی نیوز چینل پر پریس سکریٹری کیرولین لیویٹ نے گفتگو میں کہا کہ صدر ڈونلڈ ٹرمپ کو حادثے کے بارے میں رپورٹ کردیا گیا ہے۔ جبکہ صدر ٹرمپ کا بھی بیان سامنے آیا ہے جس میں انہوں نے کہ ہے کہ وہ خوفناک حادثے کی صورتحال کی مسلسل نگرانی کر رہے ہیں۔  واشنگٹن میں پولیس نے کہا کہ وہ دیگر ایجنسیوں کے ساتھ مل کر دریائے پوٹومیک میں ہونے والے حادثے کی تفتیش کر رہے ہیں۔ امریکی فیڈرل ایویشن اتھارٹی کے مطابق پی ایس اے ائیرلائنز Bombardier اور علاقائی جیٹ سیکورسکی H-60 ​​ہیلی کاپٹر کے درمیان تصادم ہوا ہے۔ واضح رہے کہ اس سے قبل ریگن نیشنل ایئرپورٹ پر آخری فضائی حادثہ 13 جنوری 1982 کو پیش آیا تھا جب ایئر فلوریڈا کی فلائٹ نے ایئرپورٹ سے اڑان بھری اور ایک پل سے ٹکرا کر دریائے پوٹومیک میں جا گری تھی۔ رپورٹ کے مطابق حادثے میں 78 افراد ہلاک ہوئے تھے۔ دوسری جانب جنوبی سوڈان میں بھی طیارہ حادثہ پیش آیا جس میں 20 افراد ہلاک ہوگئے۔ غیرملکی میڈیا کے مطابق طیارہ دارالحکومت جوبا کے لیے ٹیک آف کرنے کے بعد آئل فیلڈز کے قریب گرا کرتباہ ہوا۔ طیارے میں 21 افراد سوار تھے جن میں سے صرف ایک کو بچایا جا سکا۔ ہلاک افراد میں بھارتی اور چینی باشندے بھی شامل ہیں۔ حکام کے مطابق طیارہ حادثے کی تحقیقات کا آغاز کر دیا گیا ہے۔