لاہور + شکر گڑھ (نیوز رپورٹر + نامہ نگار) گورنر پنجاب سردار سلیم حیدر سے پیپلز پارٹی مینارٹی ونگ پنجاب کے نائب صدر ایڈون سہوترا کی قیادت میں فلاحی تنظیم یو ایس اے تنظیم کے سربراہ پریسٹن مائیکل نے وفد کے ہمراہ ملاقات کی۔گورنر پنجاب سردار سلیم حیدر خان نے کہا کہ حکومت پیپلز پارٹی کی سپورٹ کی وجہ سے چل رہی ہے۔ اتحادی ہونے کے باوجود ہمارے مطالبات پر عمل درآمد نہیں ہو رہا۔ پیپلز پارٹی کا ن لیگ سے اتحادی ہونے کا تجربہ بڑا مایوس کن رہا۔ اگر اس دفعہ تجربہ ناکام ہوگا تو ہمیشہ کے لئے راہیں جدا کر لیں گے۔ پی ٹی آئی اور حکومت کے درمیان مذاکرات میں ڈیڈلاک کے ذمہ دار دونوں ہیں۔ پاکستان کے آئین میں اقلیتوں کو مساوی حقوق حاصل ہیں۔ دریں اثناء شکر گڑھ میں ٹی ایل پی کے ایم پی اے محمود سنگراں کے بیٹے کے ولیمہ میں گفتگو کرتے ہوئے کہا کہ پیکا ایکٹ کا مشاورت کے بغیر نفاذ حکومت کی نالائقی ہے۔ پیکا ایکٹ پر صحافتی تنظیموں سے بات چیت اور مشاورت ضروری تھی۔ سوشل میڈیا کے حالات دیکھیں تو پیکا ایکٹ ضروری ہے۔ سوشل میڈیا پر جس کا جو دل چاہے لکھ دیتا ہے کوئی پوچھنے والا نہیں۔