اسلام آباد (نمائندہ خصوصی‘ نوائے وقت رپورٹ) وفاقی ادارہ شماریات کے مطابق ملک میں چینی کی قیمت 180روپے فی کلو تک برقرار ہے۔ چینی کی اوسط قیمت 168 روپے 81 پیسے فی کلو ہے۔ ادارہ شماریات نے چینی کی قیمتوں کے نئے اعدادو شمار جاری کردیے ہیں جن کے مطابق ملک میں چینی کی زیادہ سے زیادہ قیمت 180 روپے تک ہے جبکہ چینی کی اوسط قیمت168روپے 81 پیسے فی کلو ہے۔ دستیاب سرکاری اعداد و شمار کے مطابق ملک میں حالیہ14 ہفتوں کے دوران چینی کی اوسط قیمت میں 36 روپے 26 پیسے فی کلو کا اضافہ ہو چکا ہے۔ حالیہ ہفتے میں مہنگائی کی شرح میں 0 اعشاریہ 35 فیصد تک کمی ریکارڑ کی گئی۔ہفتہ وار بنیادوں پر مہنگائی بڑھنے کی سالانہ شرح 1.20 فیصد ریکارڈ ہوئی۔ ایک ہفتے کے دوران 18 اشیاء  سستی، 11 کی قیمتوں میں اضافہ ہوا۔ایک ہفتے کے دوران ٹماٹر فی کلو 5 روپے 67 پیسے سستے ہوئے، گزشتہ ہفتے پیاز کی فی کلو قیمت میں 4 روپے 23 پیسے کی کمی ہوئی، انڈے فی درجن 13 روپے 41 پیسے سستے ہوئے۔اعداد و شمار کے مطابق گزشتہ ہفتے کے دوران لہسن فی کلو 35 روپے سے زائد تک سستا ہوا، ہفتہ وار بنیادوں پر چینی فی کلو 1 روپے 49 پیسے تک سستی ہوئی، چائے کی پتی، دال ماش، مونگ سستی ہونے والی اشیاء  میں شامل ہیں۔عید سے قبل کپڑوں کی قیمتیں بڑھ گئیں، فی میٹر 18 روپے تک مہنگے ہو گئے، ایک ہفتے میں ایل پی جی کا گھریلو سلنڈر فی کلو 50 روپے 7 پیسے مہنگا ہوا۔ہفتہ وار بنیادوں پر سگریٹ، بیف، دہی مہنگی ہونے والی اشیاء میں شامل ہیں، چاول، مٹن، تازہ دودھ، خشک دودھ سمیت 22 اشیا ء کی قیمتیں مستحکم رہیں۔