لاہور (نوائے وقت رپورٹ) اداکار جاوید کوڈو کی نماز جنازہ سنگھ پورہ پرانی منڈی گراؤنڈ لاہور میں ادا کر دی گئی۔ سینئر اداکار جواد وسیم نے مرحوم کی نماز جنازہ پڑھائی، سہیل احمد عرف عزیزی، نسیم وکی، افضل خان عرف جان ریمبو، نوید انجم، کاشف محمود، شکیل چن، عابد شاہ سمیت تھیٹرز اور ٹیلی ویژن کے اداکاروں اور عوام کی کثیر تعداد نے شرکت کی۔ اداکاروں نے مرحوم کے بیٹوں سلمان اور طیب کے ساتھ اظہار تعزیت کیا۔ دوسری جانب وزیر اعظم شہباز شریف نے نامور فنکار اور کامیڈین جاوید کوڈو کی رحلت پر اظہار افسوس کیا اور مرحوم کی بلندی درجات اور اہل خانہ کیلئے صبر کی دعا کی۔ انہوں نے کہا کہ جاوید کوڈو ان کی وفات سے میڈیا انڈسٹری میں ایسا خلاء پیدا ہوگیا ہے جو شاید کبھی پر نہ ہو، مشکل کی اس گھڑی میں مرحوم کے اہل خانہ کے ساتھ ہیں۔ جاوید کوڈو کے انتقال پر فلم، ٹی وی اور سٹیج سے وابستہ فنکاروں نے گہرے رنج و غم کا اظہار کیا اور انکی فنی خدمات کو خراج تحسین پیش کیا ہے۔