لاہور+اسلام آباد(سپورٹس رپورٹر+نوائے وقت رپورٹ+خبر نگار خصوصی)سعودی عرب کو 2034 کے فیفا فٹبال ورلڈکپ کی میزبانی مل گئی۔فٹبال کی عالمی تنظیم فیفا کی جانب سے 2034ء کے ورلڈ کپ کی میزبانی سعودی عرب کو دینے کی تصدیق کی گئی۔سعودی عرب پہلی مرتبہ فیفا مینز ورلڈکپ کی میزبانی کریگا۔سعودی عرب کے 5 شہروں (ریاض، جدہ، الخوبر، ابہا اور نیوم) کے 15 مختلف سٹیڈیمز ورلڈ کپ میچز کی میزبانی کریں گے۔ عالمی فٹبال کی گورننگ باڈی نے تصدیق کی ہے کہ 2030 ء کے ورلڈ کپ کی میزبانی مراکش، سپین اور پرتگال مشترکہ طور پرکریں گے۔جنوبی امریکہ میں بھی 2030 ء کے ورلڈکپ کے 3 میچز کھیلے جائیں گے‘تینوں میچز تین ممالک یورا گوئے ‘ارجنٹائن اور پیرا گوئے میں ہونگے۔یاد رہے کہ گزشتہ سال 4 اکتوبر کو سعودی عرب نے باضابطہ طور پر 2034 کے فیفا ورلڈ کپ کی میزبانی کیلئے بولی جمع کرانے کا فیصلہ کیا تھا۔ سعودی عرب نے  فیفا ورلڈکپ کیلئے تیاریاں شروع کردی تھیں اور جدید طرز پر سٹیڈیم کا خوبصورت ڈیزائن بھی تیار کیا تھا۔وزیراعظم شہباز شریف نے فیفا ورلڈ کپ کی میزبانی حاصل کرنے پرسعودی عرب کو مبارکباد دی ہے ۔انہوںنے کہا کہ سعودی ولی عہد شہزادہ محمد بن سلمان کو مبارکباد پیش کرتا ہوں ۔یہ کامیابی سعودی عرب کی عالمی کھیلوں میں بڑھتے اثرو رسوخ کا مظہر ہے ۔