ذرائع کا کہنا ہے کہ راولپنڈی میں ٹریفک پولیس کی گاڑیوں اور دیگر وسائل کو ٹک ٹاک کے لیے استعمال کیا جارہا ہے۔ذرائع کے مطابق سی ٹی او راولپنڈی بینش فاطمہ نے راولپنڈی کی ٹک ٹاکر کو بلا کر سی ٹی او افس کا دورہ کروایا۔ ٹک ٹاکرز نے لیڈیز پولیس افسر کے ساتھ ٹک ٹاک بنائی جبکہ ٹک ٹاکرز کی ہائی ٹیز سے تواضع بھی کی گئی۔ادھر سی ٹی او افس میں ٹک ٹاکرز کی سرگرمیوں سے شہریوں کو پریشانی کا سامنا کرنا پڑا. مختلف کاموں سے سی ٹی او آنے والے شہری ٹک ٹاکرز کے دورے کی وجہ سے سی ٹی او کا انتظار کرتے رہے۔
دوسری جانب ترجمان سٹی ٹریفک پولیس نے اس حوالے سے بتایا کہ سٹی ٹریفک پولیس راولپنڈی نے ہفتہ کے روز نیوٹیک (NAVTEC) اور ٹیوٹا (TEVTA) سے منظور شدہ فرح ویمن ٹریننگ انسٹیٹیوٹ کی 40 سے زائد خواتین کو روڈ سیفٹی آگاہی پروگرام کے سلسلے میں ٹریفک ہیڈکوارٹرز ریس کورس میں خوش آمدید کہا اس تربیتی دورے میں خواتین شرکاء کو ٹریفک قوانین، لائسنسنگ کے طریقہ کار اور محفوظ ڈرائیونگ سے متعلق تفصیلی معلومات اور عملی تربیت فراہم کی گئی۔ ترجمان کے مطابق شرکاء نے ڈرائیونگ سیمولیٹر سمیت مختلف برانچز کا دورہ بھی کیا۔ترجمان نے کہا کہ سٹی ٹریفک پولیس راولپنڈی ایک عوامی خدمت کا ادارہ ہے. جہاں ہر شہری کو احترام اور مساوات کی بنیاد پر خوش آمدید کہا جاتا ہے، سٹی ٹریفک پولیس راولپنڈی شہریوں کے ساتھ عزت، احترام اور رواداری کے اصولوں پر یقین رکھتی ہے۔
