ساہیوال (نمائندہ نوائے وقت) محکمہ لائیو سٹاک نے لمپی سکن بیماری کی پہلی لوکل ویکسین تیار کرلی۔ محکمہ لائیو سٹاک اس بیماری پر قابو پانے کی مکمل صلاحیت رکھتا ہے۔ لمپی سکن کے حوالے سے الرٹ جاری کر دیا۔ سیکرٹری لائیو سٹاک ثاقب علی نے بتایا صوبہ بھر میں انٹر پروونشل چیک پوسٹ پوسٹ قائم کر دی تاکہ کوئی بھی انفیکٹڈ جانور پنجاب میں داخل نہ ہو۔ مویشی پال حضرات کیلئے جلد کی متعدی بیماری جسے لمپی سکن کہا جاتا ہے کے حوالے سے الرٹ جاری کیا گیاہے۔ ڈائریکٹر جنرل ریسرچ لائیو سٹاک پنجاب کے دفتر کی طرف سے صوبہ سندھ میں مورو اور نوشہرو فیروز میں لمپی سکن کے حالیہ کیسز کے پیش نظر ایک لمپی سکن ڈیزیز الرٹ جاری کیا گیا ہے۔ یہ الرٹ مویشی پال حضرات کو Lumpy Skin Disease (LSD) کے بارے میں خبردار کرتا ہے تاہم پنجاب میں ابھی تک لمپی سکن ڈزیز کا ایک کیس بھی رپورٹ نہیں ہوا۔ لمپی سکن ڈزیز مویشیوں کو متاثر کرنے والے ایک انتہائی متعدی وائرس سے پھیلنے والی بیماری ہے۔ یہ بیماری مچھروں، مکھیوں کے کاٹنے کے ساتھ ساتھ متاثرہ جانوروں سے براہ راست رابطے کے ذریعے بھی پھیلتی ہے۔ ایل ایس ڈی کی علامات میں جلد کے نوڈول جلد اور ابھرے ہوئے گھائو، تیز بخار اکثر 41 ڈگری سینٹی گریڈ تک پہنچ جاتا ہے۔ دودھ کی پیداوار میں کمی، سوجے ہوئے لمف نوڈ اور اسقاط حمل اور بانجھ پن شامل ہے۔