منامہ(نوائے وقت رپورٹ) بحرین میں بھارتی ریستوران نے باحجاب خاتون کو داخلے سے روک دیا جس کے بعد حکام نے فوری کارروائی کرتے ہوئے ریستوران کو سیل کردیا، ذمہ داران کو 10 سال قید کی سزا ہوسکتی ہے۔ تفصیل کے مطابق  بھارتی ریستوران میں ہندو مینیجر نے حجاب پہنی خاتون کو اندر داخل ہونے سے روکا، واقعے کی ویڈیو سوشل میڈیا پر وائرل ہورہی ہے ۔بھارتی ریستوران کی انتظامیہ نے سماجی رابطوں کی ویب سائٹس پر پیغام پوسٹ کیا ہے جس میں انہوں نے معافی مانگی ہے۔پیغام میں کہا گیا ہے مینیجر سے غلطی ہوئی اسے نوکری سے برخاست کردیا ہے،ریستوان کی جانب سے خیر سگالی کے طور پر 29 مارچ کو مفت کھانے کا بھی اعلان کیا گیا ہے جس میں کسی شخص سے کوئی قیمت وصول نہیں کی جائے گی۔بحرین کی ٹورازم اینڈ ایگزیبیشن اتھارٹی نے واقعے کی تحقیقات کا آغاز کردیا ہے، بحرینی قانون کے مطابق نسل پرستانہ اقدام ثابت ہونے پر ذمہ داران کو 10 سال قید کی سزا ہوسکتی ہے۔