اسلام آباد (نوائے وقت رپورٹ) یوٹیلیٹی سٹورزکارپوریشن نے دعویٰ کیا ہے کہ موجودہ حکومت میں پہلی بار رمضان ریلیف پیکیج2021ء کے دوران سیل مقررہ ہدف سے زائد رہی ہے۔ دستاویز کے مطابق یوٹیلٹی سٹورزکی رمضان پیکیج کے تحت فروخت 25 ارب 96 کروڑ روپے رہی جو مقررہ ہدف سے 1 ارب 96 کروڑ روپے زائد ہے۔ رواں سال رمضان ریلیف پیکیج کے تحت یوٹیلٹی سٹورز کی سیل کا ہدف 24 ارب روپے مقررکیا تھا تاہم اس کی سیل 25 ارب 96 کروڑ تک رہی ہے۔ دستاویزکے مطابق یوٹیلٹی سٹورز کارپوریشن کے کوئٹہ اور ایبٹ آباد کے سوا تمام زونز نے مقررہ سیل ہدف حاصل کیا ہے۔ رواں سال رمضان المبارک میں اسلام آباد زون کی فروخت سب سے زیادہ 4 ارب 49 کروڑ 44 لاکھ روپے رہی۔ دستاویزکے مطابق لاہور زون کی فروخت 4 ارب 38 کروڑ 25 لاکھ روپے جبکہ ملتان زون 3 ارب 62 کروڑ کی سیل کے ساتھ تیسرے نمبر پر رہا۔ فیصل آباد زون میں یوٹیلٹی سٹورز سے 3 ارب 59 کروڑ 10 لاکھ اور پشاور زون سے 3 ارب 20 کروڑ 16 لاکھ روپے کی فروخت ریکارڈ کی گئی۔ دستاویزکے مطابق ایبٹ آباد زون کی فروخت 2 ارب 62 کروڑ 82 لاکھ جبکہ کراچی میں 1 ارب 67 کروڑ روپے کی فروخت ہوئی ہے۔ یوٹیلٹی سٹورز کارپوریشن کے سکھر زون میں فروخت 1 ارب 45 کروڑ 16 لاکھ جبکہ کوئٹہ زون میں کم سے کم فروخت 90 کروڑ 81 لاکھ روپے ریکارڈ کی گئی۔