کراچی (کامرس رپورٹر) پاکستان کے سمندری علاقے میں تمام سٹیک ہولڈرز کے ذریعے سکیورٹی کے موجودہ طریقہ کار کو جانچنے کے لئے مشق سی گارڈ 2025ء کا انعقاد کیا جائے گا، آج (پیر) سے شروع ہونے والی سمندری مشق کا اختتام 28فروری کو ہوگا۔ بحری مشق سی گارڈ کا انعقاد پہلی مرتبہ سن 2024ء میں کیا گیا جس میں 50سے زائد ملکی سٹیک ہولڈرز نے حصہ لیا تھا۔ ریئر ایڈمرل فیصل امین نے کہا یہ مشق مشترکہ آپریشنز کی صلاحیتوں کو بہتر بنانے اور میری ٹائم سکیورٹی کو درپیش نئے چیلنجز سے نبرد آزما ہونے کے لئے ایک سنگ میل کے طورپر استعمال ہوگی۔ قدرتی وسائل کے ساتھ مختلف میری ٹائم چیلنجز بھی جنم لیتے ہیں جن میں غیرقانونی فشنگ، نارکو سمگلنگ، انسانی سمگلنگ، ماحولیاتی تبدیلی وغیرہ شامل ہیں۔ انہوں نے کہا کہ سن 2013 میں جوائنٹ میری ٹائم انفارمیشن اینڈ کوآرڈینیشن سینٹر قائم کیا گیا تاکہ میری ٹائم ڈومین کے تمام سٹیک ہولڈرز کو ایک پلیٹ فارم فراہم کیا جاسکے۔