اسلام آباد(وقائع نگار)اولڈ سٹوڈنٹس لیڈرز کے سرپرست اعلیٰ اور رکن قومی اسمبلی ریاض فتیانہ نے پاکستان میں نظریاتی احساس ، قومی یکجہتی ،حب الوطنی ، حقیقی جمہوریت ، معاشی ترقی و خوشحالی اور تمام طبقات کے درمیان ہم آہنگی و مساوات،برابری اور لیڈرشپ کی تعمیر کیلئے ایک وسیع پروگرام کے تحت ملک بھر کے سابق طلبا تنظیمی راہنماوں کو اولڈ سٹوڈنٹس لیڈرز میں شمولیت کی دعوت دیتے ہوئے حکومت سے ملک بھر کی طلبہ تنظیموں کی بحالی کا مطالبہ کیا ہے، نیشنل پریس کلب اسلام آباد میں تنظیم کے مرکزی صدرمحمد آصف چٹھہ ایڈووکیٹ، صوبائی صدر پنجاب انجینئر رانا مبشرعلی خان،صوبائی نائب صدر پنجاب مرزا منصور بیگ، مرکزی سیکرٹری اطلاعات انجینئر عدنان حسن، خالد نواز بوبی، محمد بنارس چوہدری، شہزادہ بٹ و دیگر کے ہمراہ پریس کانفرنس کرتے ہوئے انہوں نے کہا کہ اولڈ سٹوڈنٹس لیڈرز کے پلیٹ فارم پر ماضی میں طلبا سیاست میں متحرک رہنے والے مختلف طلبا تنظیموں اور سٹوڈنٹس یونین کے نمائندوں کو اکٹھاکیا جارہا ہے پاکستان میں طلبہ تنظیموں پر پابندی سے ملک میں عدم برداشت، اور مذہبی منافرت بڑھتی چلی جا رہی ہے ، تنظیم کے مرکزی صدرمحمد آصف چٹھہ نے کہا کہ پاکستان کے تمام صوبوں آزاد کشمیر اور فیڈرل ایریا اسلام آباد سمیت تمام علاقوں سے سابق طالب علم رہنما اکھٹے ہو رہے ہیںاگلے مرحلہ میں فکری تحریک ، برداشت، رواداری اور پاکستان کے مستقبل کیلئے حقیقت پسندانہ اور قابل عمل پروگرام دیا جائے گا،آئین پاکستان پر عمل کر کے ہی پاکستان کو حقیقی پاکستان بنایا جاسکتا ہے،صوبائی صدر پنجاب رانا مبشر علی خان نے ا ولڈ سٹوڈنٹس لیڈرکے اغراض و مقاصد بیان کرتے ہوئے کہا کہ تنظیم کا قیام وقت کی ضرورت تھی تنظیم کا مرکزی دفتر اسلام آباد میں قائم کر دیا گیا اور آن لائن ممبر شپ کا آغاز ہوچکا اب تک 20 ہزار مختلف طلبا تنظیموں کے سابقہ عہدیداران جن کا تعلق ایم ایس ایف ، پی ایس ایف ، آئی ایس ایف ، اے ٹی آئی ، جمعیت و دیگر تنظیموں سے تھا اس قومی دھارے میں شامل ہوچکے ہیں۔