لاہور(سپورٹس رپورٹر)پاکستان میں باسکٹ بال کھیل کیلئے ایک اہم پیشرفت، امریکی ادارے سی ٹی آئی سپورٹس اور فیڈرل باسکٹ بال ایسوسی ایشن کے زیر اہتمام بین الاقوامی باسکٹ بال ٹریننگ کیمپ کا اسلام آباد میں آغازہوگیا۔ فیڈرل باسکٹ بال ایسوسی ایشن کے جنرل سیکرٹری اوج ظہور کے مطابق امریکہ سے تعلق رکھنے والے معروف کوچز لوک ایلی اور جیکب کم کی زیر نگرانی تربیتی کیمپ 28 اپریل تک جاری رہے گا جس کا مقصد جدید تربیتی طریقہ کار کے ذریعے وفاقی دارالحکومت کے منتخب نوجوان کھلاڑیوں کی صلاحیتوں کو نکھارنا ہے جبکہ اس اقدام سے پاکستان باسکٹ بال کے شعبے کو بین الاقوامی سطح پر ایک نئی پہچان ملی ہے۔ ہمارے نوجوانوں کو عالمی سطح کے ماہرین سے تربیت حاصل کرنے کا موقع ملا ہے جو اس کھیل کے جدید تقاضوں کو بخوبی سمجھتے ہیں۔اوجِ ظہور نے کہا تربیتی سیشنز بحریہ یونیورسٹی کے انڈور باسکٹ بال کورٹ میں منعقد ہو رہے ہیں، جہاں کی انتظامیہ نے مہمان کوچز اور کھلاڑیوں کیلے سہولیات اور لاجسٹک معاونت فراہم کی ہے۔ تربیتی کیمپ میں پانچ مقامی کوچز کو بھی راہنمائی فراہم کی جا رہی ہے تاکہ کیمپ کے بعد بھی بین الاقوامی معیار کی کوچنگ دے سکیں۔