لاہور(سپورٹس رپورٹر)آئی سی سی امپائر اور سابق سری لنکن کرکٹر کمارا دھرما سینا نے قذافی سٹیڈیم کا دورہ کیا اور ماضی کی حسین یادوں میں کھو گئے۔دھرما سینا نے کہا کہ قذافی سٹیڈیم کے ساتھ سری لنکن کرکٹ کی خاص یادیں جڑی ہوئی ہیں۔ انہوں نے یاد دلایا کہ یہی وہ تاریخی میدان ہے جہاں سری لنکا نے 29 سال قبل 1996 کا ورلڈ کپ جیتا تھا۔ 29 سال قبل بطور کھلاڑی اس میدان میں کھیلنا ایک ناقابل فراموش لمحہ تھا، اور آج بطور امپائر یہاں آنا میرے لیے خوشی کا باعث ہے۔انہوں نے قذافی سٹیڈیم کی جدید تعمیر کو سراہتے ہوئے کہا کہ اسے نئی شکل میں دیکھ کر خوشی ہوئی۔دھرما سینا نے پاکستان کرکٹ کیلئے نیک خواہشات کا اظہار کرتے ہوئے کہا کہ پاکستان اور چیمپئنز ٹرافی کیلئے میری دعائیں اور نیک تمنائیں ہیں۔