راولپنڈی(اپنے سٹاف رپورٹر سے)پارلیمانی سیکرٹری برائے اطلاعات و نشریات بیرسٹر دانیال چوہدری نے کہا ہے کہ قوم نے پی ٹی آئی کے نفرت انگیز بیانیے کو واضح طور پر مسترد کردیا ہے،عوام پر اب پی ٹی آئی کے انتشاری ہتھکنڈوں کا کوئی اثر نہیں ہوتا، مسلم لیگ (ن) کی قیادت میں ملک آگے بڑھ رہا ہے۔ نجی نیوز چینل کو انٹرویو دیتے ہوئے بیرسٹر دانیال چوہدری نے کہا کہ پاکستان مسلم لیگ (ن) کی قیادت نے پی ٹی آئی کے  نفرت انگیز بیانیے کو پیچھے چھوڑتے ہوئے پاکستان کو کامیابی کے ساتھ ترقی اور استحکام کی راہ پر گامزن کیا ہے۔ انہوں نے پی ٹی آئی کی ملک میں انتشاری ہتھکنڈے استعمال کرتے ہوئے  نفرت، افراتفری اور عدم استحکام پھیلانے کی مذمت کی۔ بیرسٹر دانیال چوہدری نے کہا کہ  پاکستان ترقی کی راہ پر گامزن ہو گیا ہے اور  پی ٹی آئی کا انتشاری بیانیہ عوام نے مسترد کر دیا ہے ،ملک آگے بڑھ رہا ہے اور حکومت کی کوششوں کے مثبت نتائج سامنے آرہے ہیں۔ انہوں نے کہا کہ پی ٹی آئی کی ملک میں افراتفری ، انتشار پھیلانے اور ملک کی ترقی میں خلل ڈالنے کی خواہش پوری نہیں ہو گی۔بیرسٹر دانیال چوہدری نے9 مئی کے واقعات  کی شدید مذمت کی ۔پارلیمانی سیکرٹری اطلاعات و نشریات نے خیبر پختونخوا (کے پی کے) میں پی ٹی آئی کی 11 سالہ حکومت کو تنقید کا نشانہ بناتے ہوئے کہا کہ وہاں کی حکومت عوام کو ریلیف فراہم کرنے  میں مکمل طور پر ناکام ہو گئی ہے۔