اسلام آباد (نمائندہ خصوصی) وفاقی وزیر منصوبہ بندی احسن اقبال سے وزیر اعلیٰ بلوچستان میر سرفراز بگٹی نے اسلام آباد میں ملاقات کی، ملاقات میں پی ایس ڈی پی کے تحت جاری ترقیاتی منصوبوں پر تفصیلی تبادلہ خیال کیا گیا۔ بلوچستان کی ترقی، وسائل کی منصفانہ تقسیم اور بہتر منصوبہ بندی سے متعلق اہم مشاورت ہوئی۔ احسن اقبال نے کہا کہ وفاقی حکومت بلوچستان کی ترقی کے لیے ہر ممکن تعاون فراہم کر رہی ہے۔ وفاقی و صوبائی ہم آہنگی کے ذریعے بلوچستان کو ترقی کی نئی راہوں پر گامزن کریں گے۔ کوشش ہے کہ آئندہ پی ایس ڈی پی کا حجم بڑھا کر صوبوں کو مزید ترقیاتی مواقع فراہم کیے جائیں، پی ایس ڈی پی 2025-26ء کا جائزہ لیا۔ سرفراز بگٹی نے کہا کہ تمام منصوبوں پر اطمینان ہے، صوبائی حکومت ترقیاتی عمل میں وفاق کے ساتھ قدم بہ قدم چلنے کے لیے پرعزم ہے۔ ترقیاتی ایجنڈے میں وفاق کے ساتھ صوبوں کی شراکت قابل ستائش ہے۔ سنٹرل ڈویلپمنٹ ورکنگ پارٹی کے اجلاس میں جو وفاقی وزیر منصوبہ بندی احسن اقبال کی صدارت میں ہوا، 10 ترقیاتی منصوبوں کی منظوری دی گئی، چار منصوبے جن کے لاگت 21.83 بلین  روپے ہے، سی ڈی ڈبلیو پی نے منظور کر لیے جبکہ 227.34 بلین روپے لاگت کے باقی چھ منصوبوں کو حتمی منظوری کے لیے ایکنک کو ارسال کر دیا گیا۔ اجلاس میں سات ارب 49 کروڑ روپے سے زائد لاگت کے اسلام آباد سیف سٹی توسیعی  منصوبے کو زیر غور لایا گیا۔ سی ڈی ڈبلیو پی نے اس کی منظوری دے دی۔ اس وقت اسلام آباد کا 35 فیصد حصہ نگران کیمروں کے ذریعے مانیٹر ہوتا ہے، اس منصوبے کی تکمیل سے اسلام آباد کی تمام بڑی سڑکیں ، مذہبی مقامات، وی وی آئی پی ایریاز اور سرکاری عمارتیں داخلے اور اخراج کے تمام مقامات کیمرے کی نگرانی میں ہوں گے۔ اس منصوبے کے 365 نئے کیمرے لگائے جائیں گے۔ اس منصوبے کے تحت نئے فیچر بھی شامل ہوں گے جن میں آٹومیٹڈ نمبر پلیٹ کی شناخت  ، چہرے کی شناخت وغیرہ بھی شامل ہے، ہائر ایجوکیشن کی شعبہ میں نیشنل سینٹر فار کوانٹم کمپیوٹنگ کے قیام کی منظوری دی گئی۔