لاہور(سپورٹس رپورٹر)بھارتی سازشیں ناکام ہوگئیں ‘بنگلہ دیشی ٹیم 3 ٹی20 انٹرنیشنل میچز کھیلنے کیلئے پاکستان آئیگی۔پاکستان کرکٹ بورڈ کی جانب سے جاری کردہ اعلامیہ میں تصدیق کی گئی ہے کہ دونوں بورڈز کے سربراہان کے درمیان دبئی میں درمیان مذاکرات کامیاب ہوگئے ہیں، جس کے بعد بنگلادیشی ٹیم دورہ پاکستان کیلئے آئیگی۔مختصر دورے کے دوران 3 ٹی20 انٹرنیشنل میچز کھیلے جائیں گے۔پاکستان اور بنگلہ دیش کے درمیان 3 ٹی20 انٹرنیشنل میچز 27، 29 اور 31 مئی کو لاہور میں کھیلے جانے کی توقع ہے۔چیئرمین پی سی بی محسن نقوی اور بنگلہ دیش کرکٹ بورڈ کے چیئرمین ناز ملعابدین اور صدر فاروق احمد کے درمیان طویل ملاقات کے بعد فیصلہ ہوا۔پاکستان اور بنگلہ دیش کے درمیان سیریز کے تینوں ٹی20 میچز لاہور کے قذافی سٹیڈیم میں کھیلے جائیں گے۔قبل ازیں بنگلادیش اور پاکستان کے درمیان 5 ٹی20 میچز کی سیریز شیڈولڈ تھی، سیریز کیلئے 25 مئی سے 3 جون تک شیڈول کا اعلان کیا گیا تھا۔