لاہور(سپورٹس رپورٹر)پاکستان اور نیوزی لینڈ کی کرکٹ ٹیموں کے درمیان پانچ ٹی 20انٹرنیشنل میچوں پر مشتمل سیریز کا تیسرا میچ آج  آکلینڈمیں کھیلا جائیگا۔ پاکستانی وقت کے مطابق میچ سوا گیارہ بجے شروع ہو گا۔ میزبان نیوزی لینڈ کی ٹیم کو سیریز میں0-2کی برتری حاصل ہے۔پاکستان کو سیریز بچانے کا چیلنج در پیش ہے ۔ آج میچ ہارنے کی صورت میں پاکستان سیریز بھی ہار جائے گا۔ ٹیم میں ایک سے دو تبدیلیوںکا امکان ہے ۔ فاسٹ بائولر محمد علی کی جگہ آل رائونڈر عباس آفریدی کو شامل کیا جاسکتا ہے ۔ اوپنر حسن نوا ز کی جگہ عثمان خان وکی شمولیت کا امکان ہے ۔ پاکستان کرکٹ ٹیم کے عبوری ہیڈ کوچ عاقب جاوید نے کہا ہے کہ کسی بائولر کو 4 چھکے پڑ جانا کوئی بڑی بات نہیں ہے، شاہین شاہ آفریدی کو بھی اپنی گیم کو بڑھانا ہوگا۔آکلینڈ میں میڈیا سے گفتگو کرتے ہوئے عاقب جاوید نے کہا کہ فاسٹ بائولر کی کارکردگی بڑھتی رہنی چاہیے، شاہین شاہ آفریدی کو اگر انٹرنیشنل کرکٹ میں خود کو منوانا ہے تو اس کو اور بہتر کرنا پڑیگا۔ نیوزی لینڈ میں چھوٹی باؤنڈریز ہیں، پاکستانی بیٹرز اگر اوپر سے اچھا سکور کریں گے تو جیت سکتے ہیں، پاکستان ٹیم کم بیک کریگی اور سیریز جیتنے کی پوری صلاحیت رکھتی ہے، نیوزی لینڈ کی کنڈیشن میں کھیلنا آسان نہیں ہوتا۔ 2 میچ ہار گئے لوگ ناراض ہیں، تیسرے ٹی ٹونٹی میں ممکن ہے ایک سے دو تبدیلیاں کی جائیں۔ تشکیلِ نو کے مرحلے سے گزرنے کا مقصد یہ نہیں کہ جیتنا نہیں ہے، جن کھلاڑیوں نے ملک سے باہر کم کرکٹ کھیلی ہو تو مسائل ہوں گے۔ سرفراز کی کپتانی والی بات 4 سال پرانی ہوگئی، جو ٹیم ٹی ٹونٹی میں بہتر تھی اس کو بھی 2 سال ہوگئے، دو سال میں کرکٹ بدل گئی ہے، ٹی ٹونٹی کی ٹیمیں الگ بننے لگی ہیں۔ ہم بھی ٹی ٹونٹی کی الگ ٹیم بنانے کی کوشش کر رہے ہیں، ٹی ٹونٹی میں سٹرائیک ریٹ بڑی اہمیت رکھتا ہے، ایشیا کپ اور ورلڈ کپ دونوں اہم ایونٹ بھارت میں ہیں، ایشیا کی وکٹوں پر لمبے سکور ہوتے ہیں‘میگاایونٹ کی تیاری کر رہے ہیں۔ آسٹریلیا میں سیریز ہوئی، جہاں لمبے سکور نہیں بنتے، جنوبی افریقہ، نیوزی لینڈ ور آسٹریلیا کی کنڈیشن میں سیریز آسان نہیں ہوتی، نوجوان مشکل کنڈیشن میں کھیلیں گے تو اعتماد ملے گا، مشکل کنڈیشن میں کھیل کر جو اعتماد ملے گا وہ ایشیا کی کنڈیشن میں بہت کام آئیگا۔ پاکستان ٹیم اصل تیاری تو ایشیا کپ اور ورلڈ کپ کی کر رہی ہے، صائم ایوب اور فخر زمان جب اس ٹیم کو جوائن کریں گے تو اچھی ٹیم بن جائے گی۔