لاہور(نامہ نگار)ایسٹر کو پرامن بنانے کے تناظر میں پنجاب پولیس کے انٹیلی جنس بیسڈ سرچ، سویپ اینڈ کومبنگ آپریشنز جاری ہیں۔ گذشتہ 24 گھنٹوں کے دوران 432 کومبنگ آپریشنز،14857 مشتبہ افراد کی چیکنگ اور 50 مشکوک افراد حراست میں لیا گیا۔ 43 سرچ اینڈ سویپ آپریشنز کیے گئے اور 1968 افراد سے پوچھ گچھ کی گئی جبکہ 12 مشتبہ افراد کو گرفتار کیا گیا۔سنگین جرائم میں ملوث 228 اشتہاری، 132 عدالتی مفرور اور 57 عادی مجرمان کو بھی گرفتار کیا گیا۔جرائم پیشہ و مشتبہ افراد کے قبضہ سے بڑی تعداد میں ناجائز اسلحہ اور گولیاں برآمد کی گئیں۔ جرائم پیشہ افراد کیخلاف کاروائی کے دوران ایک مجرم کیفرکردار کو پہنچایا گیا جبکہ5 زخمی ہوئے۔آئی جی پنجاب ڈاکٹر عثمان انور نے کہا ہے کہ دہشت گردوں اور جرائم پیشہ عناصر کی سرکوبی کیلئے پنجاب پولیس کی فرضی مشقیں بھی جاری ہیں۔فرضی مشقوں میں پنجاب پولیس،سی ٹی ڈی، سپیشل برانچ،ایلیٹ فورس،ریسکیو 1122، اور قانون نافذ کرنے والے اداروں کی ٹیمیں حصہ لے رہی ہیں۔