لاہور(نیوز رپورٹر) سپیشل سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن طارق محمود رحمانی نے گورنمنٹ ٹیچنگ ہسپتال شاہدرہ کا اچانک دورہ کیا۔ ایڈیشنل سیکرٹری فنانس اشفاق الرحمن بھی ہمراہ تھے۔ سپیشل سیکرٹری صحت نے مریضوں کی عیادت کی اور طبی سہولیات بارے فیڈ بیک لیا۔دورہ کے دوران ہسپتال میں ادویات کی فراہمی، ڈاکٹرز کی حاضری، وزیر اعلیٰ شکایت سیل و دیگر شعبہ جات میں طبی سہولیات کا جائزہ لیا گیا۔وزیر اعلیٰ مریم نواز کے ویژن کے مطابق موقع پر پیشنٹ کیئر بارے ہدایات جاری کی گئی ہیں۔ ایمرجنسی میں پبلک ایڈریس سسٹم مکمل فعال ہے۔ لواحقین کیلئے کرسیوں اور بنچوں کا انتظام کر دیا گیا ہے۔ جاری ہدایات پر عملدرآمد کروایا جا رہا ہے۔ طارق محمود رحمانی نے کہا مریضوں کے علاج و معالجہ میں کسی قسم کی کوتاہی برداشت نہیں کریں گے۔سرکاری ہسپتالوں کا دورہ کرکے حالات کا جائزہ لیا جا رہا ہے۔کوشش ہے کہ سرکاری ہسپتالوں میں مریضوں کو کسی پریشانی کا سامنا نہ کرنا پڑے۔