لاہور ( این این آئی) پنجاب سمیت ملک کے مختلف شہر دھند کی لپیٹ میں آگئے، حد نگاہ کم ہونے پر موٹر ویز متعدد مقامات سے بند کر دی گئی۔ترجمان موٹر وے پولیس کے مطابق دھند کے باعث موٹر وے ایم 2لاہور سے کوٹ مومن، موٹر وے ایم 3سمندری سے درخانہ جبکہ ایم 4گوجرہ سے ملتان تک ٹریفک کے لئے بند کی گئی ،موٹر وے ایم 5پر ملتان سے روہڑی تک ٹریفک کا داخلہ ممنوع رہا ۔بعد ازاں حد نگاہ بہتر ہونے پر موٹر ویز کھول دی گئیں ۔اس کے علاوہ قومی شاہراہوں پر بھی حد نگاہ کم ہونے سے ٹریفک کی روانی متاثر ہوئی جس سے مسافروں کو مشکلات کا سامنا کرنا پڑا ۔موٹر وے پولیس کا کہنا ہے کہ ڈرائیور حضرات اپنی گاڑیوں میں آگے اور پیچھے دھند والی فوگ لائٹس کا استعمال کریں تاکہ دیگر گاڑیوں کو بہتر طور پر دیکھا جا سکے، غیر ضروری سفر سے گریز، تیز رفتاری سے پرہیز کریں اور اگلی گاڑی سے مناسب فاصلہ رکھیں۔دوسری جانب ملک کے بیشترعلاقوں میں موسم سرد ہے، پہاڑی علاقوں میں شدید سردی رہنے کی پیشگوئی کی گئی ہے۔محکمہ موسمیات کے مطابق بلوچستان، خیبرپختونخوا، گلگت بلتستان، کشمیر، مری اور گلیات میں بارش و برف باری کا امکان ہے، اس کے علاوہ اسلام آباد، پشاور، چارسدہ، چترال، دیر، سوات، کرک اور کوہاٹ میں بھی بادل برسیں گے۔