لاہور (خبر نگار) لاہور ہائیکورٹ نے ضلعی حکومتوں کو تحلیل کرنے سے متعلق حکومت پنجاب کی جانب سے جواب نہ جمع کرانے پر برہمی کا اظہار کیا ہے۔ جسٹس شجاعت علی خان نے ضلعی حکومتوں کو تحلیل کرنے کے خلاف کیس کی سماعت کی۔ درخواست گزار کرنل مبشر کے وکیل نے مؤقف اپنایا کہ حکومت پنجاب نے کسی قانونی جواز کے بغیر ضلعی حکومتیں تحلیل کیں۔ عدالت ضلعی حکومتیں بحال کرنے کا حکم دے۔ عدالت نے سیکرٹری لوکل گورنمنٹ کو تحریری جواب جمع کرانے کی ہدایت کی۔ جس پر ایڈیشنل ایڈووکیٹ جنرل پنجاب رانا شمشاد نے کہا کہ تحریری جواب جمع کرانے کی مہلت دی جائے۔ عدالت نے کہا کہ آئندہ سماعت پر تحریری جواب نہ آنے پر سیکرٹری لوکل گورنمنٹ کو ذاتی حیثیت میں طلب کیا جائے گا۔