لاہور (نامہ نگار) کاؤنٹر ٹیرارزم ڈپارٹمنٹ نے برکی روڈ کے قریب مقابلے کے بعد ٹی ٹی پی کے ایک دہشت گرد خودکش حملہ آور کو گرفتارکر لیا جبکہ اس کا ساتھی زخمی حالت میں فرار ہونے میں کامیاب ہو گیا ہے۔ سی ٹی ڈی ترجمان کے مطابق لاہور بڑی تباہی سے بچ گیا ہے۔ سی ٹی ڈی نے دو خطرناک دہشت گردوں کی گرفتاری کے لئے برکی روڈ کے قریب انٹیلی جنس بیسڈ کارروائی کی۔ سی ٹی ڈی ٹیم کو دیکھتے ہی دہشت گردوں نے فائرنگ کر دی۔ سی ٹی ڈی کی کراس فائرنگ کے نتیجے میں ایک خطرناک دہشت گرد زخمی ہو گیا، جو کہ زخمی حالت میں موقع سے فرار ہونے میں کامیاب ہو گیا ہے جبکہ ایک خودکش دہشت گرد کوگرفتار کرکے اس کے قبضے سے خودکش جیکٹ، سیفٹی فیوز وائر اور بارودی مواد برآمد کر لیا گیا ہے۔ گرفتار خودکش دہشت گرد کی شناخت حافظ شمس کے نام سے ہوئی ہے، جو کہ بلوچستان کا رہائشی ہے۔ دہشت گرد لاہور  پر بڑے حملے کی منصوبہ بندی مکمل کرچکے تھے۔ دہشت گردوں کی اطلاع ملتے ہی پولیس کی بھاری نفری اور  افسران موقع پر پہنچ گئے۔ سی ٹی ڈی ٹیموں اور پولیس نے فرار ہونے والے دہشت گرد کی گرفتاری کیلئے برکی کے نواحی علاقوں کو گھیرے میں لے کر سرچ آپریشن شروع کر دیا ہے۔ دریں اثناء سی ٹی ڈی نے دہشت گردوں کے خلاف مقدمہ درج کر کے تفتیش شروع کر دی ہے۔