لاہور (نوائے وقت رپورٹ) وزیر اطلاعات پنجاب عظمیٰ بخاری نے کہا کہ دشمن کے خلاف فتح نے ویژن کی روشن علامت ہے۔ انہوں نے وزیر اعلیٰ پنجاب مریم نواز کی جانب سے وزیر اعظم شہباز شریف، افواجِ پاکستان اور عسکری قیادت کو خراجِ تحسین، ایک بار پھر تاریخ رقم کر دی۔ لاہور میں ناشتہ کرنے کے خواب دیکھنے والوں کو ہمارے شاہینوں نے مکمل ضیافت بھارت میں بھجوا دی۔ ان خیالات کا اظہار انہوں نے ڈی جی پی آر میں پریس کانفرنس کرتے ہوئے کیا۔ انہوں نے کہا کہ بھارت گھٹنوں کے بل آ چکا ہے۔ وزیر اطلاعات نے قوم کو مبارکباد دیتے ہوئے کہا کہ یہ کامیابی صرف فوج یا حکومت کی نہیں بلکہ پوری قوم کی یکجہتی، قربانی اور جذبہ حب الوطنی کا نتیجہ ہے۔ اللہ تعالیٰ کے شکر کے ساتھ آج پاکستان ایک عظیم کامیابی کا جشن منا رہا ہے۔ پاکستان کے خلاف سازشوں کا مقابلہ کرنے میں ہماری فوج، قیادت اور عوام نے جس مثالی اتحاد اور جرات کا مظاہرہ کیا، وہ تاریخ میں سنہری حروف سے لکھا جائے گا۔ جے ایف 17 تھنڈر جیسے جدید طیارے کا پروگرام سابق وزیر اعظم نواز شریف کا ویژن تھا۔ انہی کے فیصلوں سے پاکستان کی دفاعی قوت ناقابلِ تسخیر بنی اور ایٹمی دھماکوں سے ملک کو حقیقی تحفظ ملا۔ واضح کیا کہ مسئلہ کشمیر کو نظرانداز کر کے پاک بھارت امن ممکن نہیں۔