لاہور(نیوز رپورٹر)ریلوے کا شاندار ماضی رہا ہے۔ ادارے کی عظمت رفتہ بحال کریں گے۔ محفوظ سفر پہلی ترجیح ہے، اس بارے کوئی کوتاہی اور عذر قبول نہیں۔سگنل سسٹم کی بہتری پر توجہ مرکوز کی جائے۔ رابطہ ایپلی کیشن کے انٹرفیس کو صارف دوست بنایا جائے اور عوامی مفاد میں منصوبوں کی جلد از جلد تکمیل کی جائے۔ تنخواہ، پنشن کی بر وقت ادائیگی کیلئے ذاتی نگرانی کروں گا۔ ٹریک میٹریل چوری کی روک تھام اور ریڈنڈنٹ ٹریک کی حفاظت یقینی بنائی جائے۔ وسائل کا موثر اور شفاف استعمال کیا جائے اور ریلوے آمدن بڑھانے کیلئے بزنس پلان پیش کیا جائے۔ ان خیالات کا اظہار نگران وفاقی وزیر ریلوے شاہد اشرف تارڑ نے ریلوے ہیڈکوارٹرز لاہور کے دورہ کے موقع پر افسران سے گفتگو کرتے ہوئے کیا۔نگران وزیر ریلوے کو پاکستان ریلوے کے مختلف شعبہ جات کی کارکردگی، اصلاحات اور مستقبل کے منصوبوں بارے تفصیلی بریفنگ دی گئی۔ اس موقع پر چیئرمین ریلوے، چیف ایگزیکٹو افسر پاکستان ریلوے، آئی جی ریلوے پولیس اور ریلوے کے مختلف شعبوں کے پرنسپل افسران بھی موجود تھے۔شاہد اشرف تارڑ نے متعلقہ افسران کو ریلوے نیٹ ورک کی شمسی توانائی پر منتقلی کی پیش رفت رپورٹ وزارت میں جمع کروانے کی ہدایت کی۔ فریٹ آمدن بڑھانے کیلیے اقدامات کیے جائیں۔ وزیر ریلوے نے مینجمنٹ کو ناقابل استعمال کوچز اور لوکوموٹوز کو ڈسپوز آف کرنے کا پلان پیش کرنے کی ہدایت بھی کی۔نگران وزیر ریلوے کی زیر صدارت اجلاس میں ریلوے پولیس کانسٹیبل کی پوسٹ کو گریڈ 7 میں اپ گریڈ کرنے کا فیصلہ بھی کیا گیا۔بعد ازاں وزیر ریلوے نے مغلپورہ ورکشاپ لاہور کا دورہ کیا جہاں انہیں ورکشاپ کی ورکنگ اور کارکردگی پر تفصیلی بریفنگ دی گئی۔