نئی دہلی (نیٹ نیوز) بھارتی سکیورٹی فورسز اور ماؤ نواز علیحدگی پسندوں کے درمیان جاری رہنے والی جھڑپ میں تین درجن کے قریب افراد ہلاک اور متعدد زخمی ہو گئے۔ بھارتی میڈیا کے مطابق سکیورٹی فورسز کا علیحدگی پسندوں کے ساتھ رواں برس کا سب سے بڑا مقابلہ چھتیس گڑھ کے جنگلات میں ہوا ہے۔ ترجمان پولیس کا کہنا ہے کہ گھمسان کی لڑائی میں کم از کم 2 سکیورٹی اہلکار ہلاک اور 10 سے زائد زخمی بھی ہوئے ہیں جنہیں ہسپتال منتقل کردیا گیا۔ پولیس نے دعویٰ کیا کہ فوج اور پیرا ملٹری فورسز کے ساتھ جھڑپ میں 31 ماؤ نواز جنگجو بھی مارے گئے اور بڑی تعداد میں اسلحہ بھی برآمد ہوا۔ چھتیس گڑھ حکومت کے ترجمان نے بتایا کہ جنگلات میں آپریشن اب بھی جاری ہے۔ مزید جانی نقصان کا امکان ہے۔ یاد رہے کہ گزشتہ ماہ 23 جنوری کو بھی چھتیس گڑھ کے ضلع گریبند میں ماؤ نواز جنگجوؤں کے ساتھ جھڑپ میں 16 جنگجو ہلاک ہوگئے تھے۔ دہائیوں سے بھارت کے مرکزی اور مشرقی ریاستوں میں غیر منصفانہ وسائل کی تقسیم کے خلاف علیحدگی پسند تحریکیں مسلح جدوجہد کر رہی ہیں۔