اسلام آباد (نمائندہ  خصو صی ) پاکستان پیپلز پارٹی کی ترجمان شازیہ مری  نے  بیان میں کہا ہے کہ ن پاکستان پیپلز کے بزرگ رہنما اور سابق سینیٹر فرحت اللہ بابر کے خلاف ایف آئی اے کی انکوائری قابلِ افسوس ہے، یہ انتہائی تشویشناک ہے کہ ایف آئی اے نے فرحت اللہ بابر کے خلاف ایک بے بنیاد انکوائری کا آغاز کیا ہے، دہائیوں سے فرحت اللہ بابر مظلوموں کے ساتھ کھڑے رہے، انسانی حقوق کے لیے آواز بلند کی، اور اقتدار کے سامنے وقار اور اخلاقی بصیرت کے ساتھ احتساب کا مطالبہ کرتے رہے، یہ سراسر مضحکہ خیز ہے کہ  فرحت اللہ بابر پر اختیارات کے ناجائز استعمال کا الزام لگایا جا رہا ہے، سینیٹر فرحت اللہ بابر گزشتہ ایک دہائی سے کسی بھی سرکاری عہدے پر فائز نہیں رہے، بظاہر ایک نجی شکایت کی بنیاد پر شروع کی گئی یہ انکوائری نہ صرف بے وقت بلکہ اس کے پیچھے مقاصد بھی مشکوک نظر آتے ہیں، فرحت اللہ بابر کی پوری سیاسی زندگی دیانت، اصول پسندی اور جمہوری اقدار سے وابستگی کی ایک روشن مثال ہے، ایسے ہتھکنڈے نہ صرف عوام کے اداروں پر اعتماد کو متزلزل کرتے ہیں بلکہ اْن لوگوں کے حوصلے پست کرتے ہیں جو سچ بولنے کی جرات رکھتے ہیں،  دیں اثنا پیپلزپارٹی کے سینئر رہنما فرحت اللّٰہ بابر نے وفاقی تحقیقاتی ادارے  سے شکایت اور الزامات کا ریکارڈ مانگ لیا۔ایف ائی اے نے شہری کی شکایت پر پی پی رہنما فرحت اللّٰہ بابر کو نوٹس بھیجا تھا، جس پر اپنے تحریری جواب میں سینئر سیاستدان نے شکایت اور الزامات کا ریکارڈ طلب کیا ہے۔