لاہور( خصوصی نامہ نگار )سیکرٹری جنرل پاکستان عوامی تحریک خرم نواز گنڈا پور نے آزادی صحافت کے عالمی دن کے موقع پر کہا انسانی حقوق کے تحفظ کیلئے صحافیوں نے ہر دور میں قربانیاں دیں۔ مغرب ہو یا مشرق ملک غریب ہو یا امیر ہر خطہ اور ملک میں صحافیوں کیلئے پیشہ وارانہ فرائض کی ادائیگی آسان نہیں ہوتی لیکن پھر بھی صحافی جان پر کھیل کر مظلوم اور کمزور طبقات کی آواز بنتے ہیں۔ صحافی آئین و قانون کی بالادستی کیلئے اپنی ذمہ داریاں نبھاتے ہیں۔ میڈیا کا کردار صرف خبر رسانی تک محدود نہیں بلکہ بیداری شعور میں ان کا کردار نمایاں ہے۔ میڈیا ایک مضبوط، منصفانہ اور قانون پسند معاشرے کی تشکیل میں اہم کردار ادا کر تا ہے۔ آئین اور قانون کی بالادستی کے بغیر کوئی بھی معاشرہ ترقی نہیں کر سکتا۔ قانون کی حکمرانی انصاف کی فراہمی آزادی اظہار کے ساتھ منسلک ہے۔ میڈیا کو چاہیے کہ وہ عوام کو آئینی حقوق اور ذمہ داریوں سے آگاہ کرے تاکہ ایک با شعور اور قانون پسند معاشرہ تشکیل دیا جاسکے۔ انہوں نے اپنے بیان میں صحافیوں کو خراج تحسین پیش کرتے ہوئے کہا آزادی اظہار اور بنیادی انسانی حقوق کے تحفظ کیلئے صحافت کا شعبہ اہم کردار ادا کر رہا ہے۔ ہر دور میں صحافیوں نے حق گوئی کی بھاری قیمت ادا کی ہے۔