لاہور(نامہ نگار)ڈی آئی جی آپریشنز لاہور فیصل کامران نے کہا ہے کہ بہترین فورس کی تشکیل کیلئے محکمانہ احتساب کلیدی کردار ادا کرتا ہے۔چند کالی بھیڑوں کو پورے محکمہ کی بدنامی کا سبب نہیں بنے دیں گے۔کرپشن،اختیارات سے تجاوز کرنے والے افسران واہلکار کڑے احتساب کیلئے تیار رہیں۔ ان خیالات کا اظہار انہوں نے گزشتہ روز پولیس لائنز قلعہ گجر سنگھ میں ہفتہ واراردل روم کے دوران کیا۔ڈی آئی جی آپریشنز نے اختیارات سے تجاوز سمیت مختلف شکایات پربعد از انکوائری 8 اہلکاروں کو سزائیں سنائیں۔قصور وار ثابت ہونے پر سروس و تنخواہ ضبطگی و دیگر سزائیں دی گئیں۔انہوں نے 3 اہلکاروں کے شوکاز نوٹسز کی دوبارہ انکوائری کا بھی حکم دیا۔فیصل کامران نے کہا کہ اختیارات سے تجاوز کرنے والے عوام اور پولیس فورس دونوں کے دشمن ہیں۔ گزشتہ گیارہ ماہ میں 4 سو سے زائد اہلکاروں کو سزائیں دی جا چکی ہیں۔