وانا( آئی این پی ) چیک پوسٹ کے قریب دھماکے میں 2 بچے اور دہشتگردوں کی فائرنگ سے ایس ایچ او جاں بحق اور بچے سمیت چار افراد زخمی ہو گئے۔ جنوبی وزیرستان میں ایف سی چیک پوسٹ کے قریب دھماکے کے نتیجے میں 2 بچے جاں بحق جبکہ ایک زخمی ہو گیا ۔ذرائع کے مطابق کہ جنوبی وزیرستان کے علاقے اعظم ورسک میں آئی ای ڈی دھما کہ ہوا ، جس میں دو بچے جاں بحق ہو گئے ، دھماکے کے بعد علاقے میں خوف و ہراس پھیل گیا۔ لاشوں اور زخمی بچے کو فوری طور پر قریبی اسپتال منتقل کر دیا گیا جبکہ پولیس نے موقع پر پہنچ کر علاقے کو گھیرے میں لے کر دھماکے کی نوعیت اور محرکات جاننے کے لیے تحقیقات کا آغاز کر دیا۔تاحال دھماکے کی ذمہ داری کسی گروہ نے قبول نہیں کی تاہم سیکیورٹی ادارے واقعے سے متعلق مختلف پہلوئوں کا جائزہ لے رہے ہیں۔دوسری جانب جنوبی وزیرستان کے علاقے وانا میں امن کمیٹی کے دفتر کے قریب 3 روز قبل ہونے والے بم دھماکے کے مزید 3 زخمی دم توڑ گئے جس کے بعد دھماکے میں جاں بحق افراد کی تعداد 12 ہوگئی۔ پولیس حکام کا بتانا ہے کہ ڈسٹرکٹ ہیڈکوارٹراسپتال وانا میں دھماکے میں زخمی ہونے والے 18 افراد تاحال زیر علاج ہیں۔خیبرپی کے کے ضلع چارسدہ میں نامعلوم موٹرسائیکل سواروں کی کار پر فائرنگ سے پولیس اہلکار جاں بحق جبکہ محکمہ صحت کا ملازم شدید زخمی ہوگیا جبکہ بنوں میں دہشت گردوں کی فائرنگ سے تھانہ صدر کے ایس ایچ او ایک اہلکار سمیت زخمی ہو گئے،پولیس کی جوابی کارروائی میں ایک دہشتگرد ہلاک اور اسکا ساتھی فرار ہوگیا ۔ پولیس حکام کے مطابق چارسدہ کے علاقے غنی خان روڈ پر افسوسناک واقعہ پیش آیا جہاں نامعلوم موٹر سائیکل سواروں نے کار پر فائرنگ کر دی جس کے نتیجے میں ایک پولیس اہلکار شہید جبکہ محکمہ صحت کا ملازم شدید زخمی ہوگیا۔شہید ہونے والے پولیس اہلکار کی شناخت فاروق کے نام سے ہوئی ہے، جو نیب آفس میں ڈیوٹی پر تعینات تھا، فائرنگ کے بعد حملہ آور فرار ہو گئے۔پولیس کا کہنا ہے کہ جاں بحق اہلکار کی نعش اور زخمی کو فوری طور پر ڈسٹرکٹ ہیڈ کوارٹر ہسپتال منتقل کر دیا گیا ہے۔واقعے کے بعد علاقے میں خوف و ہراس پھیل گیا، جبکہ پولیس نے جائے وقوعہ سے شواہد اکٹھے کر کے تحقیقات شروع کر دی ہیں، حملہ آوروں کی تلاش کیلئے سرچ آپریشن جاری ہے۔دوسری جانب بنوں میں دہشت گردوں کی فائرنگ سے تھانہ صدر کے ایس ایچ او ایک اہلکار سمیت زخمی ہو گئے۔ ، پولیس کی جوابی فائرنگ سے ایک دہشت گرد ہلاک اور اس کا ساتھی فرار ہو گیا۔مارے گئے دہشت گرد سے اسلحہ اور دستی بم ملا ہے، زخمی ایس ایچ او وسیم سجاد اور اہلکار حیات اللہ کو ڈی ایچ کیو ہسپتال منتقل کر دیا گیا۔