اسلام آباد (نمائندہ خصوصی ) اسلام آباد چیمبر آف کامرس اینڈ انڈسٹری کے صدر احسن ظفر بختاوری نے ملک کی نئی صنعتی پالیسی کی تشکیل کے لیے وفاقی وزیر تجارت ڈاکٹر گوہر اعجاز کی سربراہی میں انڈسٹری ایڈوائزری کونسل کی تشکیل کا خیرمقدم کیا اور اس بات پر زور دیا کہ نئی صنعتی پالیسی میں ایس ایم ایز کی بہتر ترقی پر خصوصی توجہ دی جائے جس سے معیشت کی بحالی کی راہ ہموار ہو گی اور ملک مشکلات سے نکل کر پائیدار ترقی کی راہ پر گامزن ہو گا۔احسن بختاوری نے کہا کہ ایس ایم ایز ہماری معیشت کی ترقی میں ریڑھ کی ہڈی کی حیثیت رکھتی ہیں کیونکہ یہ کاروباری ادارے معاشی سرگرمیوں اور برآمدات کو فروغ دینے کے ساتھ ساتھ روزگار کے مواقع پیدا کرنے، غربت میں کمی اور اختراع کو فروغ دینے میں بھی اہم کردار ادا کرتے ہیں۔