لاہور (نیوز رپورٹر) گورنر پنجاب سردار سلیم حیدر  نے کہا کہ پیپلز پارٹی ن لیگ کی اتحادی  ضرور ہے لیکن خاموش تماشائی نہیں بنے گی۔ صوبے کے عوام کی ترقی اور انہیں بنیادی سہولتوں کی فراہمی پر آواز بلند کرتا رہوں گا۔ یہ بات اْنہوں نے گورنر ہائوس لاہور میں ڈسٹرکٹ اوکاڑہ سے مسلم لیگ ن کے ورکروں کی پیپلز پارٹی میں شمولیت اور گورنر ہائوس میں آ ئے مختلف وفود سے ملاقات کے دوران کہی۔ اس موقع پر گورنر پنجاب نے پیپلزپارٹی میں شمولیت اختیار کرنے والے مسلم لیگی ورکروں کو خوش آمدیدکہتے ہوئے کہا کہ ان کی شمولیت سے پیپلز پارٹی صوبے میں مزید مضبوط اور مستحکم ہوگی۔ اْنہوں نے کہا کہ پیپلز پارٹی سیالکوٹ میں ہونے والے ضمنی انتخاب میں بھرپور حصہ لے گی۔ گورنر پنجاب نے کہا کہ بلاول بھٹو جلد پی پی 52 کے انتخابات میں پارٹی رہنمائوں کو گائیڈ لائن دیں گے۔ اْنہوں نے مزیدکہا کہ پیپلزپارٹی کسانوں، کاشتکاروں کے ساتھ کھڑی ہے اور ان کے مسائل کے حل کے لیے بھرپور کردار ادا کرے گی۔