لاہور(سپورٹس رپورٹر)پاکستان چیمپئنز لیگ تھرڈ ایڈیشن کے کئی میچز،2 سیمی فائنلز اور فائنل کے فیصل آباد میں ڈے اینڈ نائٹ انعقاد کیلئے بھرپور تیاریاں شروع کردی گئیں۔ملک کی سب سے بڑی وہیل چیئرکرکٹ پی سی ایل کے تھرڈ ایڈیشن کا میلہ سجنے کو تیارہے جس کے تیسرے ایڈیشن کے شاندار انعقاد کیلئے پاکستان وہیل چیئر کرکٹ کونسل نے مئی کے آخر میں منصوبہ بندی کرلی ہے تاہم حتمی تاریخوں کا اعلان بعد میں کیا جائیگا۔پاکستان وہیل چیئر کرکٹ کونسل وپاکستان چیمپئنز لیگ تھرڈ ایڈیشن کے آرگنائزر کی جانب سے بتایا گیا ہے کہ موجودہ ایڈیشن میں دو نئی ٹیموں کو شامل کیا گیا ہے جس سے پی سی ایل کی ٹیموں کی تعداد 8ہوجائیگی۔ فیصل آباد رائلز اور کشمیر ٹائیگرزپاکستان چیمپئنز لیگ 3 کا حصہ ہونگی جبکہ دیگر ٹیموں میں دو مرتبہ کی دفاعی چیمپئن لاہور سکندرز، کراچی آرچرز، کوئٹہ سٹرائیکرز، ملتان کنگز، پشاور لائنز اور اسلام آباد سٹالینز شامل ہیں۔ پی سی ایل میں ٹیموں کو دو گروپس میں تقسیم کیا گیا ہے اور مجموعی طور پر 15 میچز کھیلے جائیں گے۔ لیگ کے کچھ میچز لاہور جبکہ بقیہ میچز،دو سیمی فائنلز اور فائنل فیصل آباد میں ڈے اینڈ نائٹ کھیلے جائیں گے۔ پی سی ایل میں ملک بھر سے سو سے زائد کھلاڑی لیگ کا حصہ ہونگے۔