کراچی (اسٹاف رپورٹر) امیرجماعت اسلامی پاکستان حافظ نعیم الرحمن کی اپیل پر اہل غزہ و فلسطین کی حمایت و یکجہتی کے لیے ملک گیر شٹر ڈائون ہڑتال کی کراچی کے تاجروں نے مکمل حمایت کا اعلان کر دیا ہے ،علاوہ ازیں امیر جماعت اسلامی کراچی منعم ظفر خان نے شہر بھر کے حلقہ جات کے اجتماع کارکنان سے آن لائن خطاب کرتے ہوئے کارکنان و ذمہ داران کوہدایت کی ہے کہ 26اپریل کی شٹر ڈائون ہڑتال کو بھر پور اور کامیاب بنانے اور اسرائیلی مصنوعات کے بائیکاٹ کی مہم کو تیز اور مؤثر بنانے کے لیے شہر بھر میں بڑے پیمانے پر عوامی رابطہ مہم چلائیں ۔ تفصیلات کے مطابق امیر جماعت اسلامی کراچی منعم ظفر خان نے آل کراچی تاجر اتحاد کے چیئر مین عتیق میر ، کراچی الیکٹرانک ڈیلرز ایسوسی ایشن کے صدر محمد رضوان عرفان اور صدر کوآپریٹو مارکیٹ ایسوسی ایشن کے جنرل سیکریٹری محمد اسلم خان سے ملاقات کی اور ملک گیر شٹر ڈائون ہڑتال کے حوالے سے تبادلہ خیال کیا  اور بتایا کہ پنجاب سمیت پورے ملک کی تاجر تنظیموں اور سول سوسائٹی کی مشاورت سے طے کیا گیا ہے کہ پورے ملک میں ایک ہی دن 26اپریل کو مکمل شٹر ڈائون ہڑتال کی جائے گی ، عتیق میر ، رضوان عرفان اور اسلم خان نے منعم ظفر خان کو شٹر ڈائون ہڑتال کی مکمل حمایت اور تعاون کی یقین دہانی کرائی اور کہا کہ کراچی کے تاجر فلسطین کاز کے لیے 26اپریل کو تمام دکانیں اور مارکیٹیں بند کر کے بھر پور اظہار ِ یکجہتی کریں گے ، ملاقات میں جماعت اسلامی کراچی کے ڈپٹی سیکریٹری و سابق رکن سندھ اسمبلی یونس بارائی اور ڈپٹی سیکریٹری اطلاعات صہیب احمد بھی موجود تھے ۔دریں اثناء منعم ظفر خان نے اجتماعات کارکنان سے آن لائن خطاب کرتے ہوئے مزید کہا کہ 26اپریل کی شٹر ڈائون ہڑتال اور صہیونی مصنوعات کی بائیکاٹ کی مہم کو ہمیں ایک چیلنج کے طور پر لینا ہے اور بھر پور منصوبہ بندی کے تحت آگے بڑھنا ہے ، کراچی کی ہر یوسی اور ٹائون میں یہ مہم چلانی ہے ، کارکنان و ذمہ داران کمیٹیاں اور وفود بنا کر تاجروں ،دکانداروں ، مارکیٹوں و سپر اسٹورز ،بااثر افراد اور عوام الناس سے بڑے پیمانے پر رابطے کریں اور اس سلسلے میں بلدیاتی نمائندے اور اضلاع کے ذمہ داران مؤثر کوآر ڈی نیشن کریں ۔ انہوں نے کہا کہ شہر بھر میں ہڑتال کے سلسلے میں بڑے پیمانے پر بینرز آویزاں کیے جائیںگے اور ہیڈ بل تقسیم کیے جائیں گے جبکہ ہڑتال اور بائیکاٹ مہم کے حوالے سے فلوٹ بھی تیار کیے جائیں گے جو شہر بھر میں گشت کریں گے ۔ صہیونی مصنوعات کے بائیکاٹ کی مہم  کے لیے عوامی رابطوں کے ساتھ ساتھ سوشل میڈیا کو بھی مؤثر طور پر استعمال کیا جائے ۔ منعم ظفر خان نے خواتین کارکنان و ذمہ داران پر بھر زور دیا کہ وہ اسکولوں میں بھی رابطہ کریں اور اساتذہ طلبہ و طالبات کو صہیونی مصنوعات کی بائیکاٹ مہم کا حصہ بنائیں ۔