کراچی(این این آئی)سندھ ہائی کورٹ نے اسپیشل جوڈیشل الائونس کو فوری غیر منجمد کرنے کا حکم دیتے ہوئے ریمارکس دیئے ہیںکہ اگر عملدرآمد نہ کیا گیا تو سیکریٹری فنانس ذاتی حیثیت میں پیش ہوں۔منگل کو سندھ ہائیکورٹ میں جوڈیشل الائونس کی عدم ادائیگی سے متعلق جوڈیشل عملے کی جانب سے سندھ حکومت کیخلاف توہین عدالت کی درخواست کی سماعت ہوئی۔ عدالت نے ریمارکس دیئے کہ کیا سندھ حکومت نے سپریم کورٹ سے حکم امتناع حاصل کیا؟ سرکاری وکیل نے موقف دیا کہ سندھ حکومت نے درخواست دائر کر رکھی ہے تاحال حکم امتناع نہیں مل سکا۔ عدالت مے ریمارکس دیئے کہ جوڈیشل الائونس دینے کے عدالتی فیصلے پر تاحال عملدرآمد کیوں نہیں ہوا؟ سرکاری وکیل نے موقف دیا کہ یہ صرف ایک الائونس کا معاملہ نہیں ہے، سرکاری ملازمین کے 100 سے زائد ہیں۔ سندھ حکومت کے پاس اتنی رقم موجود نہیں۔ عدالت نے ریمارکس دیئے یہ ہمارا مسئلہ نہیں آپ نے حکم کے مطابق واجبات ادا کرنے ہیں۔ عدالت نے اسپیشل جوڈیشل الائونس کو فوری غیر منجمد کرنے کا حکم دیدیا۔ عدالت مے ریماکس دیئے کہ اگر عملدرآمد نہ کیا گیا تو سیکرٹری فنانس ذاتی حیثیت میں پیش ہوں۔عدالت نے سماعت 4 ہفتوں کے لئے ملتوی کردی۔ دائر درخواست میں موقف اپنایا گیا تھا کہ سابق چیف جسٹس نے اسپیشل جوڈیشل الائونس کی منظوری دی تھی۔ 2016 کے بعد سندھ حکومت نے اسپیشل جوڈیشل الانس کی فراہمی روک دی تھی۔ عدالتی حکم کے بعد بھی اسپیشل جوڈیشل الائونس جاری نہیں کیا گیا۔