لاہور(کامرس رپورٹر) پلاننگ اینڈ ڈویلپمنٹ بورڈ پنجاب نے خود احتسابی کی شاندار روایت قائم کرتے ہوئے کرپشن کے ٹھوس  اور ناقابل تردید شواہد کی بنیاد پر اسسٹنٹ چیف انڈسٹریز پی اینڈ ڈی بورڈ کو گرفتار کروا دیا۔ اسسٹنٹ چیف ( انڈسٹریز) پلاننگ اینڈ ڈویلپمنٹ بورڈ محمد احمد مفلح الرحمان پر الزام ہے کہ اس نے رشوت لیکر مختلف ترقیاتی سکیمیں اے ڈی پی میں شامل کروانے کی ناکام کوشش کی مگر محکمہ پی اینڈ ڈی کے مضبوط اور شفاف سکروٹنی کے نظام کے تحت اسسٹنٹ چیف ترقیاتی سکیمیں اے ڈی پی میں شامل نہ کروا سکا ۔ سیکرٹری پی اینڈ ڈی بورڈ ڈاکٹر آصف طفیل نے ابتدائی انکوائری میں رشوت کے ناقابل تردید ثبوتوں کی بنیاد پر اینٹی کرپشن اسٹیبلشمنٹ کو حکم دیا کہ وہ محمد احمد مفلح الرحمان کو گرفتار کر کے مزید تفتیش کرے جس پر اینٹی کرپشن نے کرپشن کے الزامات پر محمد احمد مفلح الرحمان کو گرفتار کر کے مزید تفتیش کا آغاز کر دیا ہے۔