اسلام آباد (خبرنگارخصوصی‘ نمائندہ خصوصی) بلوچستان میں بھارت کی معاونت سے دہشتگردی میں ملوث کالعدم بلوچستان لبریشن آرمی (بی ایل اے) کے بزدلانہ حملے میں سکیورٹی فورسز کے 7 جوان شہید ہوگئے۔ پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق 6 مئی کو بلوچستان کے ضلع کچھی کے علاقے مچھ میں بھارتی ایما پر کام کرنے والی کالعدم تنظیم نام نہاد ’بلوچ لبریشن آرمی‘ کے دہشت گردوں نے سکیورٹی فورسز کی گاڑی کو دیسی ساختہ بم سے نشانہ بنایا۔ ترجمان پاک فوج کے بیان کے مطابق اس بزدلانہ حملے کے نتیجے میں وطن کے سات سپوت شہادت کے عظیم مرتبے پر فائز ہو گئے۔ شہداء میں صوبیدار عمر فاروق‘ نائیک آصف خان‘ نائیک مشکور علی‘ سپاہی طارق نواز‘ سپاہی واجد احمد فیض‘ سپاہی محمد عاصم‘ سپاہی محمد کاشف خان شامل ہیں۔ آئی ایس پی آر نے کہا کہ واقعہ کے بعد علاقے میں کلیئرنس اور سرچ آپریشن جاری ہے‘ تاکہ دہشت گردوں کو انجام تک پہنچایا جا سکے۔ صدر مملکت آصف علی زرداری اور بلاول بھٹو نے کچھی میں بھارتی پراکسی بلوچ لبریشن آرمی کے دہشت گرد حملے کی مذمت کی ہے ۔ واقعہ میں جامِ شہادت نوش کرنے والے سکیورٹی فورسز کے 7 جوانوں کے لواحقین کے ساتھ اظہار تعزیت کیا۔