لاہور(کامرس رپورٹر) پنجاب ریونیو اتھارٹی نے رواں مالی سال میں جولائی سے دسمبر تک 118 ارب روپے کی ٹیکس وصولی کی ہے جو گزشتہ مالی سال کی اتنی مدت کے دوران کی جانیوالی ٹیکس وصولی کے مقابلے میں 10.35 فیصد زیادہ ہے۔ پنجاب ریونیو اتھارٹی کے حکام کے مطابق رواں مالی سال دسمبر میں ٹیکس وصولی کی گزشتہ سال کے مقابلے میں 16.16 فیصد گروتھ دیکھی گئی جبکہ گزشتہ ماہ نومبر کے مقابلے  میں دسمبر میں ٹیکس وصولی میں 19 فیصد گروتھ دیکھی گئی۔ اسی طرح پنجاب سیلز ٹیکس کی مد میں 8 فیصد گروتھ جبکہ پنجاب انفراسٹکچر ڈویلپمنٹ سیس کی وصولی میں 25 فیصد گروتھ اور پنجاب ورکرز ویلفیئر فنڈز کی مد میں جولائی سے دسمبر تک 76 فیصد گروتھ ہوئی ہے۔