راولپنڈی(اپنے سٹاف رپورٹر سے)ڈائریکٹر جنرل راولپنڈی ڈویلپمنٹ اتھارٹی کنزہ مرتضیٰ کی ہدایات پرآرڈی اے انفورسمنٹ اسکواڈ نے اسلام آباد کیپیٹل ٹیریٹری انتظامیہ کے اشتراک سے اسلام آباد کے علاقے G-11 مرکز میں واقع نجی ٹائون ہائوسنگ سکیم کے ہیڈ آفس کو سیل کردیا ہے آر ڈی اے کے ترجمان کے مطابق یہ کارروائی پنجاب ڈویلپمنٹ اتھارٹیز پرائیویٹ ہائوسنگ سکیم رولز 2021 کی متعدد خلاف ورزیوں کو مدنظر رکھتے ہوئے کی گئی، جن میں غیر قانونی پلاٹوں کی فروخت، غیر قانونی ترقیاتی سرگرمیاں، فراڈ پر مبنی مارکیٹنگ، اور متعدد عوامی شکایات شامل ہیں جو مختلف فورمز جیسے پی ایم پورٹل، محتسب پنجاب اور سی ایم پورٹل وغیرہ پر موصول ہوئیں۔ ڈائریکٹر جنرل آرڈی اے کنزہ مرتضی ٰنے کہا کہ آر ڈی اے اس بات کو یقینی بنانے کے لیے پرعزم ہے کہ تمام ہائوسنگ سکیمیں قوانین کی مکمل پاسداری کریں تاکہ عوام کے مفادات کا تحفظ ہو اور شہر کا ترقیاتی معیار برقرار رہے ہم ایسی کسی بھی خلاف ورزی کو برداشت نہیں کریں گے جو شہری ترقی کی سا لمیت یا عوام کی فلاح و بہبود کو متاثر کرے