لاہور(لیڈی رپورٹر) وزیراعلیٰ پنجاب مریم نواز کے سکلڈ پنجاب انیشی ایٹو کے تحت ’’میں ڈیجیٹل - دیہی خواتین کو بااختیار بنانے کے پروگرام‘‘کیلئے پنجاب آئی ٹی بورڈ اور پنجاب سکلز ڈویلپمنٹ فنڈ کے درمیان مفاہمتی یادداشت طے پا گئی۔ ایم او یو پر پی آئی ٹی بی ڈائریکٹر جنرل ساجد لطیف اور سی ای او پنجاب سکلز ڈویلپمنٹ فنڈ احمد خان نے دستخط کیے۔ یہ اشتراک دونوں اداروں کے مشترکہ ویژن کو مدنظر رکھتے ہوئے خواتین کو ڈیجیٹل خواندگی اور آن لائن کیریئر بنانے کے مواقع فراہم کر کے خود مختار بنائے گا۔ اس ضمن میں پی آئی ٹی بی ٹریننگ پارٹنر کے طور پر جامع لرننگ مینجمنٹ سسٹم کے ذریعے آن لائن ڈیجیٹل ٹریننگ اور رہنمائی فراہم کرے گا جبکہ پنجاب سکلز ڈویلپمنٹ فنڈ اس پروگرام کی مؤثر عملداری کو یقینی بنانے میں اہم کردار ادا کرے گا جس میں شرکاء کی بھرتی، تصدیق، معاونت اور نگرانی شامل ہے۔ اس اقدام کے ذریعے پی آئی ٹی بی اور پنجاب سکلز ڈویلپمنٹ فنڈ دیہی خواتین کیلئے ڈیجیٹل شعبے میں انقلابی مواقع پیدا کرنے کا عزم رکھتے ہیں ۔