گوجرانوالہ( نمائندہ خصوصی)گوجرانوالہ کی صنعتی ترقی کے فروغ کے لیے گوجرانوالہ بزنس سینٹر اور لاہور چیمبر آف کامرس کے درمیان مفاہمتی یادداشت پر دستخط کیے گئے، لاہور چیمبر کے صدر کاشف انور اور گوجرانوالہ بزنس سینٹر کے چیئرمین احمد اکرام لون نے معاہدے پر دستخط کیے۔ اس سلسلے میں گوجرانوالہ بزنس سینٹر کے وفد نے لاہور چیمبر کا دورہ کیا۔ وفد میں خالد منہاس، فصیح الرحمان، شارق کلیم، صادق صابر، خواجہ فائق اور انس فاروقی شامل تھے،صدر لاہور چیمبر کاشف انور کا کہنا تھا کہ مقامی صنعتوں کے فروغ کے لیے گوجرانوالہ بزنس سینٹر کی خدمات قابل تحسین ہیں۔ لاہور چیمبر جی،بی،سی کے ساتھ ملکر گوجرانوالہ کے صنعتی شعبے کو فروغ دینے میں اپنا بھرپور کردار ادا کرے گا اس مفاہمتی یادداشت کے تحت لاہور چیمبر جی،بی،سی کو اپنے وسیع کاروباری نیٹ ورک تک رسائی فراہم کرے گا، معلومات کے تبادلے کو فروغ دے گا اور سٹریٹیجک رہنمائی کرے گا، اس تعاون کا مقصد مشترکہ سیمینار، ورکشاپس اور تجارتی وفود کا اہتمام کرنا ہے تاکہ گوجرانوالہ کی صنعتی مصنوعات کے لیے نئی منڈیوں تک رسائی کو ممکن بنایا جا سکے، جی،بی،سی میں بنایا گیا پرماننٹ ڈسپلے سینٹر اپنی مثال آپ ہے اور ہر صنعتی شہر کی ضرورت ہے۔چیئرمین جی،بی،سی احمد اکرام لون کا کہنا تھا کہ لاہور چیمبر کا شمار ایشیا کے بڑے چیمبرز میں ہوتا ہے۔