لاہور(نامہ نگار)موجودہ سکیورٹی صورتحال کے تناظر میں پنجاب پولیس کے لاہور سمیت صوبہ بھر میں انٹیلی جنس بیسڈ سرچ، سویپ اینڈ کومبنگ آپریشنز جاری ہیں ۔ گذشتہ 24 گھنٹوں کے دوران 395 کومبنگ آپریشنز، 12282مشتبہ افراد کی چیکنگ اور 15 مشکوک افراد حراست میں لئے گئے۔ 46 سرچ اینڈ سویپ آپریشنز، 2466 افراد سے پوچھ گچھ اور 8 مشتبہ افراد کو گرفتار کیا گیا ہے۔ سنگین جرائم میں ملوث 339 اشتہاری، 120 عدالتی مفرور اور 71 عادی مجرمان بھی گرفتار کئے گئے۔ جرائم پیشہ و مشتبہ افراد کے قبضہ سے بڑی تعداد میں ناجائز اسلحہ اور گولیاں برآمد کی گئیں۔ جرائم پیشہ افراد کیخلاف کارروائی کے دوران 2 مجرمان کیفر کردار کو پہنچے اور 2 مجرم زخمی ہوئے۔ آئی جی پنجاب نے کہا کہ دہشت گردوں اور جرائم پیشہ عناصر کی سرکوبی کیلئے پنجاب پولیس کی فرضی مشقیں بھی جاری ہیں۔فرضی مشقوں میں پنجاب پولیس، سی ٹی ڈی، سپیشل برانچ، ایلیٹ فورس، ریسکیو 1122 اور قانون نافذ کرنے والے اداروں کی ٹیمیں حصہ لے رہی ہیں۔