اسلام آباد (خبرنگار) فری اینڈ فیئر الیکشن نیٹ ورک (فافن)کی جانب سے انتخابی ٹربیونلز کی کارکردگی رپورٹ جاری کر دی گئی۔ رپورٹ کے مطابق عام انتخابات 2024 کے بعد دائر کی گئی 372انتخابی درخواستوں میں سے اب تک 136درخواستوں کا فیصلہ ہوا ہے جو کہ مجموعی طور پر 37فیصد بنتی ہیں۔ قومی اسمبلی کی 26فیصد اور صوبائی اسمبلی کی 42فیصد انتخابی درخواستوں پر فیصلے سنائے جاچکے ہیں۔ فافن کے مطابق یکم فروری سے 20اپریل 2025 کے دوران 24انتخابی درخواستیں نمٹائی گئی ہیں۔ پنجاب میں اس عرصے میں 21، بلوچستان میں 2 اور سندھ میں 1 درخواست کا فیصلہ کیا گیا، جبکہ خیبر پی کے میں کوئی فیصلہ نہیں ہو سکا۔ سب سے زیادہ مسلم لیگ ن کے کامیاب امیدواروں کیخلاف درخواستیں ہیں۔ پنجاب میں لاہور، راولپنڈی اور بہاولپور کے ٹربیونلز نے زیادہ تر فیصلے کیے، جبکہ بلوچستان میں کوئٹہ اور سندھ میں کراچی کے ٹربیونلز نے ایک ایک درخواست کا فیصلہ سنایا۔ رپورٹ میں کہا گیا کہ چار ٹربیونلز کی غیر فعالیت کے باعث فیصلوں کی رفتار سست رہی، تاہم بلوچستان کے ٹربیونلز نے سب سے زیادہ 83 فیصد انتخابی درخواستیں نمٹائیں۔ پنجاب کے ٹربیونلز نے 34 فیصد، سندھ کے 22 فیصد اور خیبر پی کے کے ٹربیونلز نے 21 فیصد درخواستوں پر فیصلے دیے۔ فافن کی رپورٹ کے مطابق قومی اسمبلی کی 124 میں سے 33 انتخابی درخواستیں اور صوبائی اسمبلی کی 248 میں سے 103 درخواستیں نمٹائی جا چکی ہیں۔ مجموعی طور پر 136 میں سے 133 درخواستیں مسترد جبکہ صرف 3 درخواستیں قبول کی گئی ہیں۔ مسترد شدہ درخواستوں میں سے 52 کو ناقابل سماعت قرار دے کر، 21 کو شواہد کی عدم موجودگی پر، 9 کو واپس لینے کی بنیاد پر، 14 کو عدم پیروی اور 3 کو دیگر وجوہات کی بنا پر خارج کیا گیا۔