راولپنڈی(جنرل رپورٹر)ڈسٹرکٹ ایمرجنسی آپریشن سینٹر راولپنڈی کی جانب سے پی ڈی ایم اے کی ہدایات کی روشنی میں ممکنہ ہیٹ ویو سے بچا ئواور حفاظتی انتظامات کے حوالے سے ضلعی انتظامیہ اور متعلقہ اداروں کو مراسلہ جاری کر دیا گیا۔ مراسلے کے مطابق انتظامیہ کوعوامی مقامات بشمول بس اسٹینڈز، ریلوے اسٹیشن،تعلیمی اداروں اور ہسپتالوں میں ایمرجنسی کولنگ سنٹرز قائم کرنے کی ہدایت کی گئی ہے۔ ایمرجنسی کولنگ سنٹرز میں پینے کے پانی، پنکھے، سایہ دار جگہ پر بیٹھنے کے انتظامات اور طبی سہولیات کی فراہمی کو یقینی بنانے کے احکامات جاری کیے گئے ہیں۔ سی ای او ڈسٹرکٹ ہیلتھ اتھارٹی اور ہسپتالوں کے میڈیکل سپرنٹینڈنٹس کو ہدایت کی گئی ہے کہ وہ ممکنہ طور پر ہیٹ ویو سے متاثرہ مریضوں کے لیے وارڈ مختص کریں اور طبی سہولیات کی فراہمی کو یقینی بنائیں۔ مراسلے میں انتظامیہ کو ہدایت کی گئی ہے کہ ہیٹ ویو سے بچا ئوکے لیے عوام کو مساجد، تعلیمی اداروں،سوشل پلیٹ فارم، اور میڈیا سے آگاہی فراہم کی جائے۔ مراسلے کے مطابق ہیٹ ویو سے بچا کے لیے تمام متعلقہ ادارے پلان مرتب کریں۔