لاہور (نیوز رپورٹر) معرکہ حق اور یوم تشکر کے موقع پر  حلقہ این ا ے 127 میں وفاقی وزیر اطلاعات و نشریات کی والدہ  ساجدہ فاروق تارڑ  نے پاکستان بھارت جنگ میں جام شہادت نوش کرنے والے عظیم سپوت علی حیدر کی قبر پر حاضری دی اور پھولوں کی چادر چڑھائی۔ ڈاکٹر سعود کوآرڈینیٹر ٹو وزیر اطلاعات و نشریات، اسسٹنٹ کمشنر ماڈل ٹاؤن، ایس پی ماڈل ٹاؤن اور دیگر بھی ہمراہ تھے۔ اس موقع پر شہید کے درجات کی بلندی کے لیے فاتحہ خوانی کی گئی اور قومی پرچم کے سائے تلے ان کی قربانی کو خراجِ عقیدت پیش کیا گیا۔ ساجدہ فاروق تارڑ نے  کہا کہ پاکستان کی سرزمین پر جان قربان کرنے والے جوان ہمارے ہیرو ہیں۔  شہداء  کی قربانیوں کو یاد رکھنا اور ان کے اہل خانہ کو عزت دینا ہماری قومی و دینی ذمہ داری ہے۔ اس موقع پر اسسٹنٹ کمشنر ماڈل ٹاؤن اور ایس پی ماڈل ٹاؤن نے بھی شہید کی قربانی کو سراہا۔  اختتام پر شرکاء نے دعا کی اور عزم کیا کہ وطن کی سلامتی، ترقی اور استحکام کے لیے ہر ممکن کردار ادا کریں گے۔