رام اللہ+غزہ (این این آئی)اسرائیل نے غزہ کے جبالیہ کیمپ میں میڈیکل کلینک پر بمباری کرکے مریضوں کے چیتھڑے اڑادیے۔غیر ملکی خبر رساں ادارے کے مطابق گزشتہ 24گھنٹوں کے دوران اسرائیلی حملوں میں 143 فلسطینی شہید کردیے گئے۔جبالیہ میں میڈیکل کلینک پر اسرائیلی فوج کی جانب سے بمباری کی گئی جس کے نتیجے میں میڈیکل کلینک میں موجود مریضوں کے چیتھڑے اڑ گئے جب کہ شہدا میں 13 بچے شامل تھے۔دوسری جانب فلسطینی صدر محمود عباس نے کہا ہے کہ صرف فلسطینی ریاست ہی غزہ پر حکمرانی کرے گی اور وہ اس کا انتظام سنبھالنے کے لئے فوری طور پر تیار ہے۔ عرب ٹی وی کے مطابق انہوں نے گزشتہ روز رام اللہ میں کینسر کے مشاورتی مرکز کے افتتاح کے موقع پر خطاب کرتے ہوئے واضح کیا کہ وہ صرف ایک ہی قانون، ایک ہی فوج اور ایک ہی قانونی اسلحے کو تسلیم کرتے ہیں اور اس کے سوا کسی چیز کو قبول نہیں کریں گے۔انھوں نے کہا کہ ہماری طاقت سیاسی ، سفارتی اور صبر و استقامت پر مبنی ہے۔ فلسطینی صدر نے کہا کہ غزہ میں جنگ کو بند ہونا چاہیے۔ وہاں2 لاکھ سے زیادہ افراد شہید اور زخمی ہو چکے ہیں جو ناقابلِ تصور ہے۔