لاہور(سپورٹس رپورٹر)پاکستان ٹیسٹ ٹیم کے کپتان شان مسعود نے اس عزم کا اظہار کیا ہے کہ وہ ویسٹ انڈیز کیخلاف 2 ٹیسٹ پر مشتمل آئی سی سی ٹیسٹ چیمپئن شپ پر مشتمل سیریز 0-2 سے جیتیں گے۔انہوںنے کہا کہ جنوبی افریقہ میںسنچورین کا پہلا ٹیسٹ جیت کے قریب پہنچ کر ہارنے کا بے حد افسوس ہے لیکن اس طرح ہمارے ساتھ پہلی بار نہیں ہوا،آسڑیلیا اور بنگلہ دیش کیخلاف ٹیسٹ میچوں میں ہماری ٹیم بہترین پوزیشن سے میچ ہار چکی ہے۔کیپ ٹاؤن ٹیسٹ کی دوسری اننگز میں بابر اعظم کیساتھ پہلی وکٹ پر 205 رنز کی شراکت کے سوال پر کہاکہ مڈل آرڈر اگر مزاحمت کرتا تو ہم جنوبی افریقہ کو فتح کیلئے بڑا ہدف دے سکتے تھے۔ ہمیشہ آگے کی طرف دیکھنا چاہیے، اب ہم ہوم گراؤنڈ پر ویسٹ انڈیز کے مقابلے پر سپنرز کیساتھ حکمت عملی کیساتھ میدان میں اتریں گے۔ ملتان میں ایک بار پھر ہم سپنرز پر انحصار کرینگے، امید کرتے ہیں کہ انگلینڈ کیخلاف جیت کے تسلسل کو آگے لے کر چلیں۔انہوںنے توقع کا ظہار کیا ہے کہ ملتان میں پاکستان ٹیم ویسٹ انڈیز کو دو ٹیسٹ کی سیریز میں 0-2 سے ہرانے میں کامیاب رہے گی۔