لاہور(سپورٹس رپورٹر)پاکستان کرکٹ ٹیم کیویز سے مقابلے کیلئے نیوزی لینڈ روانہ ہوگئی۔ قومی کرکٹ ٹیم نیوزی لینڈ کیخلاف 5 ٹی ٹونٹی انٹرنیشنل اور 3 ون ڈے انٹرنیشنل کھیلے گی۔پاکستان کرکٹ بورڈ کے مطابق قومی ٹی ٹونٹی سکواڈ لاہور سے نیوزی لینڈ روانہ ہوا،ٹیم براستہ دبئی نیوزی لینڈ پہنچے گی۔ پاکستان اور نیوزی لینڈ کے درمیان 5 میچز پر مشتمل ٹی ٹونٹی سیریز 16 مارچ سے کرائسٹ چرچ میں شروع ہوگی۔پاکستان کرکٹ ٹیم دورہ نیوزی لینڈکیلئے لاہورایئرپورٹ سے براستہ دبئی کرائسٹ چرچ روانہ ہوئی، پاکستان ٹیم آج شام کرائسٹ چرچ پہنچے گی۔16 رکنی ٹی ٹونٹی سکواڈ میں سلمان علی آغا (کپتان)، شاداب خان (نائب کپتان)، عباس آفریدی، عبدالصمد، ابرار احمد، حارث رؤف، حسن نواز، عرفان خان نیازی، جہانداد خان، خوشدل شاہ، محمد علی، محمد حارث، عمیر بن یوسف، شاہین شاہ آفریدی، سفیان مقیم اور عثمان خان ہیں۔پاکستان ٹیم میں عبدالصمد اور حسن نواز بھی شامل ہیں جو پہلی مرتبہ پاکستان ٹیم میں منتخب ہوئے ہیں۔نائب کپتان کرکٹ ٹیم شاداب خان نے کہاکہ مجھے نئی ذمہ داری بھی سونپی گئی ہے، اچھا کھیلنے کی کوشش کریں گے۔ ٹیم میں بہت زیادہ نوجوان کھلاڑی شامل ہیں۔ نوجوانوں میں انرجی مختلف اور مثبت ہوتی ہے۔پہلی بار ٹیم کا حصہ بننے والے کھلاڑیوں سے بڑی امیدیں وابستہ ہیں۔امید ہے ہم کامیاب ہوں گے۔نائب کپتانی کی ذمہ داری کو اچھے سے نبھاؤں گا۔نیوزی لینڈ روانگی سے قبل گفتگو کرتے ہوئے قومی ٹی 20 ٹیم کے نائب کپتان شاداب خان نے کہا کہ اللہ کا شکر ادا کرتا ہوں دوبارہ قومی ٹیم میں موقع ملا، جو ہمیں ٹیم مینجمنٹ کی طرف سے ٹاسک دیا گیا ہے امید ہے اس پر پورا اتریں گے۔ ہماری اس ٹیم میں کافی نوجوان کھلاڑی ہیں، ٹیم کو مثبت رزلٹ ملیں گے، کسی بھی نوجوان کھلاڑی کیلئے اعزاز کی بات ہوتی ہے وہ اپنے ملک کی نمائندگی کرے۔ امید ہے اچھے نتائج ملیں گے۔