اسلام آباد(نمائندہ خصوصی) آذربائیجان کے وزیرِ معیشت میکائل جباروف کی قیادت میں اعلیٰ سطحی وفد نے پاکستان کا دورہ کیا، جس کا مقصد دوطرفہ اقتصادی تعاون کو نئی بلندیوں تک لے جانا تھا۔اس دوران وفد نے اسپیشل انویسٹمنٹ فسیلیٹیشن کونسل (ایس آئی ایف سی) کا خصوصی دورہ کیا، جہاں کونسل کے اعلیٰ حکام نے وفد کا پرتپاک استقبال کیا اور پاکستان میں سرمایہ کاری کے سازگار ماحول اور مختلف کلیدی شعبوں میں مواقع پر جامع بریفنگ دی۔آذربائیجان کے وفد نے پاکستان میں علاقائی روابط اور اسٹرٹیجک نوعیت کی موٹر ویز سمیت دیگر انفراسٹرکچر منصوبوں، تیل و گیس کی تلاش اور پائپ لائن کے منصوبوں، خصوصی اقتصادی زونز، معدنیات کی ترقی، توانائی کے شعبے میں تعاون اور آئی ٹی و ڈیجیٹل جدت جیسے اہم شعبوں میں گہری دلچسپی کا اظہار کیا۔یہ دورہ شراکت داری اور باہمی ترقی کے جذبے کی علامت ہے اور توقع کی جا رہی ہے کہ یہ آذربائیجان کی جانب سے پاکستان میں مذکورہ شعبوں میں سرمایہ کاری کے لیے مضبوط بنیاد فراہم کرے گا۔یہ نتیجہ خیز ملاقات نہ صرف دونوں ممالک کے درمیان اقتصادی روابط کو مزید مضبوط کرے گی بلکہ آذربائیجان کے صدر کے آئندہ دورہ پاکستان کے لیے ایک مؤثر پیش خیمہ بھی ثابت ہوگی، جس کے ذریعے ان دلچسپیوں کو عملی منصوبوں اور معاہدوں میں ڈھالا جا سکے گا۔