لاہور (نیوز رپورٹر) وزیر اطلاعات پنجاب عظمیٰ بخاری نے کہا ہے کہ کے پی حکومت کا 365 دنوں میں 625 منصوبے شروع کرنا مذاق کے سوا کچھ نہیں ہے۔ ایک سال میں 365 دن ہوتے ہیں، کے پی حکومت نے 625 منصوبے ایک سال میں کیسے شروع کر دئیے؟ جس صوبے کے پاس یونیورسٹیوں کو چلانے کا بجٹ نہیں اور انکو یونیورسٹیوں کی زمینیں بیچنی پڑیں وہ 625 منصوبے شروع کرنے کا جھوٹ مت بولے۔ گنڈا پور سرکار کے 625 منصوبے بھی ایک ارب درختوں کی طرح ہوں گے۔ خیبر پی کے ترقی میں نہیں بلکہ لاقانونیت، دہشتگردی اور کرپشن میں سبقت لے رہا ہے۔ ان خیالات کا اظہار انہوں نے بیرسٹر سیف کے بیان پر ردعمل میں کیا۔ انہوں نے کہا کہ ہم نے پورے سال میں ایک بھی دن کے پی حکومت کے کسی وزیر یا وزیراعلیٰ کو نئے منصوبے کا افتتاح کرتے نہیں دیکھا۔ ایک سال میں 625 دفعہ تو وزیراعلٰی دفتر تک نہیں آیا، یہ منصوبے موکلات نے شروع کروا دئیے؟ خیبر پی کے میں سرکاری ملازمین تنخواہوں کیلئے اور بلدیاتی نمائندے فنڈز کیلئے ہر ہفتے احتجاج کرتے ہیں۔ وفاق سے ملنے والے فنڈز صرف جلسے، دھرنے اور بندر بانٹ کی نظر ہورہے ہیں۔ وفاقی حکومت کو خیبر پی کے کو دیئے فنڈز کا آڈٹ کروانا چاہیے۔